Atyraýda qyzmetkerden koronavırýs anyqtalýyna baılanysty balabaqsha jabyldy
ATYRAÝ. QazAqparat –Atyraý qalasynda balabaqsha qyzmetkeri koronavırýs juqtyrdy, dep habarlaıdy QazAqparat.
Atyraý qalalyq bilim berý bóliminiń málimetine súıensek, 8 maýsymda balabaqshada tańerteńgi saǵat 08.00-de jumysqa ruqsat alý úshin temperatýralyq tekseristen ótken qyzmetkerdiń dene qyzýy bolmaǵan. Alaıda, respıratorlyq ınfektsııa belgileri anyqtalǵan soń, ol jumystan jedel bosatylǵan. Sol kúni turǵylyqty mekenjaıy boıynsha ýchaskelik dáriger jedel respıratorlyq aýrýdy rastap, qyzmetkerge eńbekke jaramsyzdyq paraqshasyn ashqan.
Al, 11 maýsymda balabaqshanyń qyzmetkerinen koronavırýsqa alynǵan synama oń nátıje bergeni anyqtalǵan.
«Qazir balabaqshada tárbıelenýshilerdi qabyldaý toqtatylyp, ǵımaratty zalalsyzdandyrý jumystary júrgizildi. Sonymen qatar, barlyq qyzmetkerden COVID-19 ınfektsııasyna synama alý josparlanyp otyr. Al, naýqaspen jaqyn baılanysta bolǵan tárbıelenýshilerden PTR-test synamasyn alý turǵylyqty mekenjaılary boıynsha emhanalarda júrgiziledi», - dep habarlady oblys ákiminiń baspasóz qyzmeti.
Buǵan deıin Atyraý qalalyq ákimdigi men NCOC qyzmetkerinen koronavırýs tabylǵanyn jazǵan edik.
