Atyraýda «Qyz Jibek» etno-folklorlyq mıýzıkli qoıylady
ATYRAÝ. QazAqparat - Atyraýǵa gastroldik saparmen «Qazaqkontsert» memlekettik kontserttik uıymynyń «Astana Musical» teatrynyń ujymy keldi, dep habarlaıdy QazAqparat óńirlik kommýnıkatsııalar qyzmetine silteme jasap.
Atyraýda ujym ókilderi «Qyz Jibek» etno-folklorlyq mıýzıklin qoımaqshy. Mıýzıkl «Rýhanı jańǵyrý» baǵdarlamasy aıasynda jáne elordanyń 20 jyldyǵyna oraılastyrylyp otyr. Mıýzıkldi qoıýdaǵy maqsat - qazaqtyń baı mádenıet tanytý.
«Qyz Jibek» mıýzıkli osyǵan deıin Frantsııa, Belgııa, Avstralııa, Reseı sahnalarynda qoıylǵan bolatyn. Sheteldik kórermender bizdi óte jyly qabyldady jáne biz sheteldik synshylardyń bizdiń qoıylymymyzǵa tamsana qaraǵandyǵyn kórdik. Endi atyraýlyqtar da ónerimizdiń laıyqty baǵasyn beredi degen úmittemiz»,-dedi óńirlik kommýnıkatsııalar qyzmetinde QR Eńbegi sińgen mádenıet qaıratkeri Ashat Maemırov.
Tólegen men Qyz Jibek sııaqty basty rólderdi Igilik Orazaly men Inabat Rızabekova oryndaıdy. Kórermender qoıylym barysynda tek qazaqstandyq kúılerdi tyńdap qana qoımaı, qazaqtyń bata berý, joqtaý sııaqty dástúrlerinen kórinisterdi tamashalap, aıtys sııaqty qazaqtyń ózge de ónerlerin kóre alady.
Etno-folklorlyq mıýzıkldi 9-10 sáýirde saǵat 19-00-de Mahambet atyndaǵy akademııalyq drama teatrda eki ret kórýge bolady.
