Atyraýda qysym datchıkterin óndiretin Qazaqstandaǵy alǵashqy kásiporyn ashyldy
ATYRAÝ. QazAqparat - Atyraýda qysym datchıkterin óndiretin Qazaqstandaǵy alǵashqy kásiporyn ashyldy. Jańa nysan Táýelsizdik merekesi qarsańynda paıdalanýǵa berildi, dep habarlaıdy QazAqparat Óńirlik kommýnıkatsııalar qyzmetine silteme jasap.
«KMG Automation» - «QazMunaıGaz» UK» AQ jáne energııany basqarý men ónerkásiptik avtomattandyrý salasyndaǵy iri álemdik kóshbasshylardyń biri «Schneider Electric» kompanııasy birigip qurǵan kásiporyn. Onda óndiriletin qysym qurylǵylary ártúrli óndiristik jáne klımattyq jaǵdaılarda kez kelgen ortanyń qysym deńgeıin anyqtap, ólsheýge múmkindik beredi.
Nysannyń saltanatty ashylý rásimine Atyraý oblysynyń ákimi, jetekshi qazaqstandyq jáne halyqaralyq kompanııalardyń, uıymdardyń basshylary men ókilderi jáne jergilikti kásipkerler qatysty.
«Elbasymyz úkimetke, ortalyq jergilikti atqarýshy organdarǵa, ulttyq kompanııa basshylaryna ónimdi shıkizat retinde paıdalanyp qana qoımaı, ony tereń óńdep, qosymsha quny joǵary ónim shyǵarýǵa tapsyrma bergen bolatyn. Osy tapsyrmany oryndaý barysynda oblysta polıetılen shyǵaratyn mekeme ashyldy, polıpropılen óndiretin mekeme qurylysy júrýde. Bul ister jalǵasyn tabady. Ólsheý quraldaryn shyǵarý kásipornynyń ashylýy da qajettiliktiń bar ekenin kórsetedi. Ónim sapasy men ónimdilikti arttyrý jónindegi máseleler baqylaýda bolady. Mamandardyń biliktiligi men tájirıbesi joǵary bolǵandyqtan álemdik standarttarǵa saı ónim shyǵatynyna senim mol»,- deıdi oblys ákimi Nurlan Noǵaev.
Aıta keteıik, zaýyt birinshi kezeńde datchıkterdi seriktester usynatyn quramdas bólikterden qurastyrady, bul qazaqstandyq úlesti 60% deıin arttyrady. Óndiris 1-kezeńde boljam boıynsha, 2000 birlikke deıin ónim óndiredi.
