Atyraýda KVI juqtyrǵandar sany artyp, jansaqtaý bóliminde júkteme 52% jetti

ATYRAÝ. QazAqparat – Atyraý oblysynda koronavırýs ınfektsııasyn juqtyrǵan 59 naýqas jansaqtaý bóliminde jatyr, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetinshe, ınfektsııalyq statsıonarlarda 947 naýqas emdelý úshin oqshaýlanǵan.

«Óńirdegi 2 632 oryndyq ınfektsııalyq statsıonarlardaǵy júkteme – 35,9%. Al 113 tósek-orny bar jansaqtaý bóliminde jaǵdaıy aýyr 59 naýqas emdelip jatyr. Onyń ishinde 8 patsıent ókpeni jasandy jeldetý apparatyna qosylǵan. Mundaǵy júkteme 52,2%-dy qurap otyr», -dep habarlady basqarmanyń baspasóz qyzmeti.

Eske sala ketelik, budan buryn Atyraýda jansaqtaý bóliminde 55 naýqas jatqanyn habarlaǵan bolatynbyz.