Atyraýda qujatsyz júrgen 25 sheteldik anyqtaldy
ATYRAÝ. QazAqparat – Atyraýda jeke basyn kýálandyratyn qujatsyz júrgen 25 sheteldik anyqtaldy, dep habarlaıdy QazAqparat.
Atyraý qalalyq polıtsııa basqarmasy bastyǵynyń birinshi orynbasary, polıtsııa podpolkovnıgi Erlan Bıǵambaevtyń aıtýynsha, «Mıgrant» jedel-profılaktıkalyq is-sharasy kezinde 200-den astam sheteldik azamatqa túsindirý jumysy júrgizilgen.
«Atyraý qalasynyń mańyndaǵy Juldyz, Tomarly, Kóktem, Aqjar, Erkinqala, Balaýsa, Jumysker, Rakýsha, Alǵabas, Tasqala, Kókarna, Vodnıkov eldi mekenderindegi jeke turǵyn úı sektory men saıajaılar tekserildi. Nátıjesinde jeke basyn kýálandyratyn qujaty joq 25 sheteldik azamat anyqtaldy. Olardyń jeke basy anyqtalǵannan keıin Qazaqstan Respýblıkasynda bolý zańdylyǵy tekserildi. Elimizdiń kóshi-qon týraly zańdylyǵyn buzǵan tulǵalarǵa qatysty ákimshilik sharalar alyndy» -deıdi Erlan Bıǵambaev.
Onyń aıtýynsha, kóshi-qon zańdylyǵyn buzǵan 119 derek anyqtalǵan. QR Ákimshilik quqyqbuzýshylyq týraly Kodeksiniń 517-babynyń 4-bólimine (Sheteldiktiń nemese azamattyǵy joq adamnyń zańnamada belgilengen merzim ótkennen on táýlikten asatyn kezeń ishinde ketýden jaltarýynan kóringen) sáıkes Ózbekstan Respýblıkasynyń 84 azamaty, atalǵan baptyń 5-bóligimen (Sheteldiktiń nemese azamattyǵy joq adamnyń júzege asyratyn qyzmeti vızada kósretilgen maqsattarǵa sáıkes bolmaýy) 35 ózbekstandyq, 518-baptyń 1-bóligimen Qazaqstan Respýblıkasynyń 41 azamaty (Qabyldaýshy tulǵanyń sheteldikterdi bolýynyń belgili qujattardy rásimdeý jóninde shara qoldanbaýy) ákimshilik jaýapkershilikke tartylǵan.
Eske sala ketelik, budan buryn Atyraý oblysynda 24 sheteldik elden májbúrli túrde shyǵarylǵanyn jazǵan edik.
