Atyraýda kúzetshi jumys berýshiden 1,5 mln teńge moraldyq ótemaqy óndirip aldy
ASTANA. QazAqparat - Atyraý qalalyq soty kúzetshiniń paıdasyna JShS-dan 1,5 mln teńge moraldyq ótemaqy óndirdi, dep habarlaıdy oblystyq sottyń baspasóz qyzmeti.
«Atyraý qalalyq sotyna azamat M.Madalıev «Karat-Security» JShS-nan 3 000 000 teńge kóleminde moraldyq zalal ótemaqysyn óndirý týraly aryzben júgindi», delingen habarlamada.
M.Madalıev «Karat-Security» JShS-nda kúzetshi bolyp istegen. 2014 jyly jeltoqsanda kúzet bólmesi retinde jasaqtalǵan temirjol konteınerindegi peshtegi zattar tutanyp, órt shyǵady. Onyń denesin ár túrli dárejedegi kúıik shalyp, úshinshi toptaǵy múgedek bolyp qalǵan.
Sot otyrysy barysynda mekeme basshylyǵynyń qaýipsizdik erejelerin buzǵandyǵy anyqtaldy. Ári, oqıǵa bolǵaly beri bir jyl ýaqyt ótse de, jumysshy áli kúnge deıin materıaldyq ótemaqy almaǵan.
Atyraý qalalyq soty QR Azamattyq kodeksiniń 952-babynyń 2-tarmaǵyna sáıkes moraldyq zalaldyń mólsherin anyqtaý barysynda jábirlenýshige keltirilgen adamgershilik zalaldyń aýyrlyǵyn sýbektıvti turǵydan, sondaı-aq jábirlenýshiniń jan azaby men tán azabynyń dárejesin dáleldeıtin obektıvti derekterin qatar eskerdi.
Sot «Karat-Security» JShS-nan talapkerdiń paıdasyna 1 500 000 teńge kóleminde moraldyq zalaldy óndirý týraly sheshim qabyldady.
Sot sheshimi zańdy kúshine endi.
