Atyraýda qýyrshaq teatrynyń alǵashqy premerasy sátti ótti
ATYRAÝ. QazAqparat – Atyraýda qýyrshaq teatrynyń alǵashqy premerasy sátti ótti, dep habarlaıdy QazAqparat.
Mahambet atyndaǵy qazaq akademııalyq drama teatrynyń janynan ashylǵan qýyrshaq teatry alǵashqy premerasy «Ata mektebi» spektaklin sahnaǵa shyǵardy. Balalarǵa arnalǵan alǵashqy premeranyń avtory – teatr ártisi Beket Zınýllın.
«Ata mektebi» – jastardyń qart ata-analaryn aýylda qaldyryp, oqýǵa, jumys isteýge, aqsha tabý úshin qalaǵa ketýge májbúr bolatyny týraly áńgime. Alaıda, qalaǵa barǵan jastar ata-anasyna qońyraý shalýdy, baryp turýdy umytyp ketedi. Kúndelikti ómirde jıi kezdesetin aqıqat demalysta atasyna qonaqqa kelgen kishkentaı nemereniń beınesinde kórinedi. Aýylda ótkizgen qysqa merzim ishinde bala atasynyń danalyq ulaǵatyna qýana zeıin qoıady. Paıdaly keńes alyp, dombyrada oınaýdy úırenedi. Baqshaǵa kútim jasaýǵa kómektesedi. Qaladaǵy ata-anasyna oralar sátte nemeresi atasyn qushaqtap, taǵy da kelýge ýáde beredi.
«Aǵa býyn – otbasylyq qundylyqtar men dástúrdi saqtap, keıingi urpaqqa jetkizýshiler. Olar bala tárbıesinde mańyzdy róli atqarady. Ata-ájeni eshbir mektep te, balabaqsha da almastyra almaıdy. Sol sebepten, biz aýyldaǵy qart ata-ananyń balalaryna, nemerelerine degen saǵynyshyn, ulaǵatyn kórsetýdi kózdedik. Olar qarashańyraqty tastap, qaladaǵy balalaryna qonys aýdarǵysy kelmeıdi. Keıde ózim de alys aýyldaǵy ata-anamdy oılap, muńaıyp qalamyn. Bul – ómir. Desek te, eń basty oı – ata-anany jalǵyz qaldyrmaýdy kórermenge jetkize aldyq dep oılaımyn», - deıdi stsenarıı avtory Beket Zınýllın.
Akademııalyq drama teatrdyń dırektory Berik Jámenovtyń aıtýynsha, Atyraýda qýyrshaq teatryn ashý ıdeıasy osydan birneshe jyl buryn týyndaǵan.
«Ońtústikte óńirdegi qýyrshaq teatrynyń ártisteri Sultan Beıbarystyń balalyq shaǵy týraly jazylǵan Rahymjan Otarbaevtyń «Saǵynysh shóbi» atty pesasyn sahnalady. Sol spektakldegi kórinister jan-dúnıemdi qozǵap jiberdi. Bul týraly teatrymyzdyń ártisterine usynys aıtyp edim. Olar Atyraýda da qýyrshaq teatryn ashý bastamasyn birden qoldady» -deıdi Berik Jámenov.
Onyń aıtýynsha, bolashaqta Almaty, Aqtóbe qalalaryndaǵy qýyrshaq teatrlarynyń mamandaryn, ártisterin shaqyrý josparlanyp otyrmyz. Qoıylymdarǵa balalar da qatystyrylmaq.
Eske sala ketelik, budan buryn Atyraýda alǵash ret qýyrshaq teatry ashylatynyn habarlaǵan bolatynbyz.
