Atyraýda kúshti jel shatyrlardy qıratýda
ATYRAÝ. 2 mamyr. QazAqparat - Atyraýda kúnniń ekinshi jartysynda jeldiń ekpini 20-25 m/s-qa jetti.
Osy ýaqytqa deıin kelgen aqparatqa sáıkes, oblys ortalyǵynyń «Almagúl» shaǵynaýdanyndaǵy ornalasqan iri sýpermarkettiń shatyryn jel ushyryp áketti. Sýpermarkettiń janyndaǵy turaqta turǵan eki kólik jaryqshaqtyń astynda qaldy. Zardap shekkender joq. Amandosov kóshesi boıynda ornalasqan taǵy bir dúkenniń shatyry kúshti jeldiń ekpinimen ushyrylyp ketti. Birneshe turǵyn úılerdiń tóbe jabyndysy, shatyrdyń metall jabyndaryna zaqym keltirilgen.
Tótenshe jaǵdaı jónindegi departamenttiń taratqan eskertpe habarlamasyna sáıkes, jel kúsheıedi, jekelegen aýdandarda jeldiń ekpini 30 m/s-qa deıin jetedi.
