Atyraýda qurylys salasynyń úzdikteri anyqtaldy
ATYRAÝ. QazAqparat - Atyraýda qurylysshylar kúnine oraı uıymdastyrylǵan baıqaýǵa 20-ǵa jýyq qurylys salasynyń mamany qatysty, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, qurylysshylar kúni merekesine oraı «Samal» yqshamaýdanynda salynyp jatqan órt sóndirý deposynyń qurylysynda sala mamandary arasynda baıqaý ótti. Baıqaý maqsaty - óńirimizdegi qurylys mamandarynyń kásibı deńgeıin joǵarylatý jáne jastardy qurylysshy mamandyǵyna tartý. 
Oblystyq qurylys basqarmasynyń uıymdastyrýymen ótken saıysta Temirlan Sapar «Úzdik sylaqshy», Bolatbaı Esqaıyrov «Úzdik qalaýshy» jáne Baqytjan Sabyrov «Úzdik dánekerleýshi» atandy.
«Mamyr aıynda Qyzylorda qalasynda qurylysshylar arasynda ótken baıqaýda Atyraý oblysynyń tas qalaýshylary birinshi oryndy ıelengen bolatynbyz. Sol bastamanyń jalǵasy retinde búgin óńirimizde konkýrs ótkizip jatyrmyz. Baıqaýda jeńimpaz atanǵan qatysýshylarǵa júldeli oryndar bar. Sonymen qatar, aldaǵy kúnderi qurylys mamandary arasynda sporttyq saıystar ótkiziledi», - deıdi Atyraý oblystyq qurylys basqarmasy qurylys bóliminiń basshysy Nurlybek Saqparov.
Aıta keteıik, elimizde qurylysshylar kúni jyl saıyn tamyz aıynyń ekinshi jeksenbisinde atalyp ótedi.
