Atyraýda Qurban aıt kezinde mal soıý pýnktteriniń jumysyn qadalaǵaý kúsheıtiledi
Búgin, 7 shildede Atyraý oblysy aýmaǵynda «Qurban aıt» merekesin toılaý kezeńinde halyqtyń sanıtarııalyq-epıdemıologııalyq salaýattylyǵyn qamtamasyz etý týraly №6 qaýlyǵa qol qoıyldy.
Qaýlyda qurbandyq shalý úshin jergilikti atqarýshy organdar aıqyndaǵan oryndarda ǵana soıýdy uıymdastyrý men júrgizýdi qamtamasyz etýge basymdyq berilgen. Osyǵan oraı turǵyndar arasynda Qurban aıt merekesin ótkizýdi uıymdastyrý, tamaqtan ýlanýǵa jáne jiti ishek ınfektsııaǵa jol bermeý maqsatynda túsindirý jumystaryn júrgizý usylynǵan.
«Veterınarııalyq qyzmettiń resmı veterınarııalyq-sanıtarııalyq qorytyndysyn alǵan mal soıý pýnktteri men alańdarda mal soıý jáne satý uıymdastyrylsyn. Tońazytqysh jabdyqtardyń jáne jeke qorǵanysh quraldarynyń qajetti sanyn qamtamasyz ete otyryp, muqtaj adamdarǵa tez buzylatyn ónimderdi (qurbandyqqa shalynǵan maldyń eti) tasymaldaý jáne saqtaý kezinde sanıtarııalyq-epıdemıologııalyq erejeler talaptarynyń saqtalýy qamtamasyz etilsin, oblys aýmaǵyndaǵy barlyq mal soıý pýnktteriniń jumysyna memlekettik veterınarııalyq-sanıtarııalyq baqylaý men qadaǵalaý kúsheıtilsin», -delingen jańa qaýlyda.
Atyraý oblysynyń turǵyndary men qonaqtaryna jiti ishek ınfektsııalarynyń jáne tamaqtan ýlanýdyń aldyn alý maqsatynda birneshe usynys berilip otyr. Onyń ishinde jeke gıgıena erejelerin saqtaý, tez buzylatyn ónimderdi tek salqyn kúıde saqtaý, tamaq ónimderin satyp alǵan kezde jaramdylyq merzimine, shyǵarylǵan kúnine nazar aýdarý, kezdeısoq adamdardan jáne sanktsııalanbaǵan saýda oryndarynan tamaq ónimderin satyp almaý bar.
Jańa qaýly 2022 jylǵy 7 shildede saǵat 00:00-den bastap kúshine enedi.
Eske sala ketelik, buǵan deıin Atyraý oblysynda koronavırýs juqtyrýshylar kóbeıip bara jatqanyn habarlaǵan bolatynbyz.
