Atyraýda quny 1,3 mlrd teńgeniń kommýnaldyq bazary memleket menshigine qaıtaryldy
Memleket basshysynyń tapsyrmasyna sáıkes oblys prokýratýrasy aktıvterdi qaıtarý boıynsha jumystar júrgizýde. Máselen, quny 1,3 mlrd teńgeni quraǵan «Saraıshyq» kommýnaldyq bazary prokýrordyń aktisi boıynsha memleket menshigine qaıtarylǵan. «Bul bazar keıinnen satyp alý quqyǵymen senimgerlik basqarýǵa jeke qolǵa berilgen. Tekserý barysynda ózine qabyldanǵan sharttyq mindettemelerdi oryndamaý, onyń ishinde áleýmettik mańyzy bar ónimderdiń baǵasyn tejeý boıynsha buzýshylyqtar anyqtaldy. Osyǵan baılanysty oblystyq sot Atyraý qalasy ákimdiginiń prokýrordyń usynysy negizinde bergen talap-aryzy boıynsha senimgerlik basqarý shartyn buzý týraly sheshim shyǵardy», - dep habarlady Atyraý oblystyq prokýrýatýrasynyń baspasóz qyzmetinen.
«Saraıshyq» kommýnaldyq bazary 2016 jyly ashylǵan. Jalpy aýmaǵy 2,6 myń sharshy metrdi quraıtyn jabyq bazarda 288 saýda orny, syıymdylyǵy 2330 tonna ónimdi saqtaıtyn 4,4 myń sharshy metr qoımasy, 2 gektar jer ýchaskesi bar. 2016 jyly iske qosylǵan bazardyń byltyrǵa deıin 51,2 mln teńge kredıtorlyq bereshegi bolǵan.
Al byltyr atalǵan bazar keıinnen satyp alý quqyǵymen 5 jyl merzimge «Ideal Market» JShS-niń senimgerlik basqarýyna berildi. Nysannyń quny 1,3 mlrd teńgege baǵalanǵan.
Eske sala ketelik, budan buryn Atyraýda seriktestik dırektory jalǵan bankrottyq deregimen sottalǵanyn jazǵan edik.