Atyraýda kúndelikti tutynatyn azyq-túlik baǵasy qymbattady
Atyraý oblystyq statıstıka departamentiniń málimetine súıensek, bıylǵy qańtarda ótken jylǵy jeltoqsanmen salystyrǵanda, azyq-túlik taýarlarynyń baǵasy 1,1%, al azyq-túlik emes taýarlar 0,8%, aqyly qyzmetter 0,1% joǵarylaǵan.
«Ótken aıda joǵary surypty bıdaı úshin ortasha baǵa ósimi 6,1% boldy. Al, jemister men kókónister – 3,2, kúrish – 2,9, jumyrtqa – 2,5, jarmalar – 1,9, makaron ónimderi – 1,4, maı jáne toń maı – 1,2%-ǵa qymbattady. Sút – 0,8, kondıterlik taǵamdar men et – 0,5, balyq jáne teńiz ónimderi – 0,4, alkogoldi ishimdikter – 0,3, temeki baǵasy 0,2%-ǵa ósti», - dep habarlady statıstıka departamentiniń mamandary.
Bıylǵy qańtarda ózge de taýarlardyń baǵasy qymbattaǵany baıqalyp otyr. Máselen, jýǵysh jáne tazalaǵysh quraldary – 1,4, jeke qoldanatyn taýarlar – 1,3, kıim jáne aıaqkıim túrleri – 0,8, farmatsevtıkalyq ónimder baǵasy – 0,6% ósken. Sondaı-aq, jolaýshylar kóliginiń qyzmeti – 1,3%, ambýlatorııalyq qyzmet quny – 0,4%-ǵa ósken.
Al, salqyn sýdy tutyný tarıfi 3,8% tómendegen.
Eske sala ketelik, budan buryn Atyraýda azyq-túlik baǵasynyń ósýine deldaldar sebep bolǵanyn habarlaǵan edik. Oblystyq kásipkerlik jáne týrızm basqarmasynyń basshysy Nurbol Jańabekovtiń málimetinshe, dúkenderge áleýmettik mańyzy bar sary maı, taýyq eti jáne sút ónimderin jetkizetin deldaldar ústeme baǵany 15%-dan asyrǵany anyqtalǵan. Máselen, keıbir kásipkerler sary maıǵa 82% ústeme baǵa qosyp, sýpermarket jelilerine satqan. Byltyrǵy qarasha-jeltoqsan aılarynda tuz baǵasy kúrt ósken. Shetelden jáne basqa óńirlerden tasymaldaýǵa baılanysty logıstıkalyq shyǵyndar esebinen tuz baǵasy 60 teńgeden 76 teńgege deıin jetken.