Atyraýda kún raıynyń qolaısyzdyǵynan birneshe shaǵyn aýdan jaryqsyz qaldy

ATYRAÝ. QazAqparat – Atyraýdyń birneshe shaǵyn aýdanynda aýa raıynyń qolaısyzdyǵynan jaryq sónip qaldy, dep habarlaıdy QazAqparat tilshisi.

Búgin Atyraýda qar jaýyp, jel ekpini údedi. «Qazgıdromet» RMM Atyraý oblystyq fılıalynyń bólim basshysy Aına Qazǵulovanyń aıtýynsha, jeldiń uıytqýy sekýndyna 15-20 metrge jetti. Jeldiń uıytqýynan jaıaý burqasyn borap tur. Aýa raıynyń qolaısyzdyǵynan Atyraý qalasynyń birneshe shaǵyn aýdany men shaharǵa irgeles ornalasqan eldi mekenderdiń turǵyndary jaryqsyz otyr. Elektr energııasy tańerteń óship qalǵan.

«Búgin aýa raıynyń kúrt ózgerip, qar jaýdy. Ekpindi jeldiń saldarynan relelik avtomatıka qurylǵysynda apatty óshirýler bolyp jatyr. Sebebi, 6/10 kV áýe elektr jelisine jalǵanǵan jeke, zańdy tulǵalar teńgerimindegi keshendi transformatorlyq stansalarǵa qar kirgen. Oqshaýlaǵyshtar men 6/10 kV saqtandyrǵysh janyp ketti», - dep habarlady «Atyraý Jaryq» AQ mamandary.

Qazir edektr energııasyn taratyn kásiporynnyń qalalyq elektr júıelerinen 15 jóndeý brıgadasy jáne 5 jedel brıgadasy keshendi transformatorlyq stansasyn tazalaý, jóndeý jumystaryna kirisken. Oǵan 2 gıdravlıkalyq kótergish (AGP), jerdi burǵylaý arqyly qazatyn arnaıy 2 tehnıka tartylǵan.

Eske sala ketelik, buǵan deıin turǵyndar aryzynan keıin Atyraýda 30 keshendi transformatorlyq stansa ornatylatynyn jazǵan edik. Atyraý qalalyq turǵyn úı-kommýnaldyq, jolaýshylar kóligi jáne avtokólik joldary bóliminiń bas mamany Muhtar Saǵandyqovtyń aıtýynsha, 40 keshendi transformatorlyq stansa satyp alynǵan. Onyń 30 danasy ornatylady. Al, 10 stansa rezervke qoıylady.