Atyraýda quqyq buzǵan 50 sheteldik elden shyǵaryldy
ATYRAÝ. QazAqparat –Atyraý oblysynda jyl basynan beri quqyq buzǵan 50 sheteldik jaýapkershilikke tartyldy, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, jyl basynan beri ákimshilik jaýapkershilikke tartylǵan sheteldikterge odan ári sharalar qabyldaý úshin kóshi-qon qyzmeti bólimderine 70-ten astam qujat túsken.
«Qylmystyq, ákimshilik quqyq buzýshylyqtardyń aldyn alý úshin júrgizilgen sharalar kezinde anyqtalǵan sheteldikterdiń arasynda Ózbekstan azamattary da bar. Shetel azamattary tarapynan ishimdik ishý, qoǵamdyq oryndarda mas júrý, avtokólikti mas kúıde júrgizý, qoǵamǵa qaýip tóndiretin basqa da quqyq buzýshylyqtar jasalǵan. Azamattyq tártipte qaraý úshin jınaqtalǵan qujattar Atyraý qalalyq sotyna joldandy», - dep habarlady departamenttiń baspasóz qyzmeti.
Sot sheshimimen 50 sheteldik azamat Qazaqstan aýmaǵynan shyǵaryldy.
«Quqyq buzǵan sheteldiktiń biri – 29 jastaǵy azamat júrgizýshi kýáliginsiz, mas kúıinde kólik júrgizgen. Ózbekstan eliniń bul azamaty QR Ákimshilik quqyq buzýshylyq týraly kodeksiniń 608-babynyń 6-bóligine sáıkes 20 táýlikke qamaýǵa alyndy. Osy azamatqa qatysty jınaqtalǵan qujattarmen tanysqan Atyraý qalalyq soty 13 qazanda deportatsııalaý týraly sheshim qabyldady.
Ózbekstan eliniń taǵy bir azamaty jaqynda qoǵamdyq jerde mas kúıinde júrgeni úshin ustaldy. 1986 jyly týǵan azamatqa QR Ákimshilik quqyqbuzýshylyq týraly Kodeksiniń 440-babynyń 1-bóligine saı, ákimshilik aıyppul salynyp, elden shyǵarý týraly sheshim shyǵaryldy», delingen habarlamada.
Atyraý qalalyq polıtsııa basqarmasynyń qyzmetkerleri sheteldikterdi Túrkistan oblysynyń Saryaǵash aýdanynda ornalasqan «Jibek joly» baqylaý-ótkizý pýnktine deıin jetkizip, Qazaqstan terrıtorııasynan shyǵarý úshin shekara qyzmetiniń qyzmetkerlerine tapsyrǵan.
