Atyraýda qudyqqa túsip ketken ıt pen sıyr qutqaryldy
ATYRAÝ. QazAqparat - Atyraýda Batys óńirlik aeromobıldik jedel qutqarý jasaǵynyń qyzmetkerleri qudyqqa túsip ketken ıt pen sıyrdy qutqardy, dep habarlaıdy QazAqparat tilshisi.
«Qala mańyndaǵy Kýrılkıno kentiniń turǵyny habarlasyp, sıyry aýzy jabyq turǵan qudyqqa túsip ketkenin jetkizdi. Qudyqtyń tereńdigi - 3 metr, keńdigi - 1,5 metr bolǵan. Qutqarýshylar sıyrdy arqanmen tartyp shyǵardy. Janýarǵa eshqandaı zaqym kelgen joq», - dep málimdedi «Batys óńirlik aeromobıldik jedel qutqarý jasaǵy» MM baspasóz qyzmeti.
Qutqarýshylar bul aptada tek sıyrmen shektelgen joq. Avangard shaǵyn aýdanynda taǵy bir janýar, bul joly ıt qudyqqa túsip ketken.
«It qańǵyp júrip, aýzy ashyq turǵan 2 metrlik kárizge túsip ketken. Qudyqtyń ishinde sýy bolǵan. Al ıt odan shyǵa almaı, úre bergen. Ony shyǵaryp alý úshin qutqarýshylarǵa 5 mınýt jetkilikti boldy. Itke eshqandaı zaqym kelmegen», - dep habarlaıdy baspasóz qyzmeti.
Jalpy, jyl basynan beri óńirlik qutqarýshylar jasaǵy úı janýarlaryn qutqarý úshin 14 ret shaqyrylǵan.
