Atyraýda kózderi kórmese de bir-birine ǵashyq jup turady
ASTANA. QazAqparat - Abylaı Ádilbekov Atyraý oblysy Qyzylqoǵa aýdanynyń týmasy. Jasy 25-te. Ol 12 jasynan beri qarańǵylyqta ómir súrip keledi. Almaty oblysy Qarasaı aýdanynyń týmasy Farıza Baqytova da 14 jasynda kóz janarynan aırylǵan. Biraq, olardyń arasyndaǵy myńdaǵan shaqyrymdar ekeýiniń mahabbatyna tosqaýyl bola almady, dep jazady Aq Jaıyq.
Abylaı sportta da, ónerde de biraz jetistikke jetip úlgergen. Balalyq shaǵyn aýyl sahnasynda án aıtýmen ótkizgen ol búginde respýblıkalyq án baıqaýlarynyń da dıplomanty atanyp úlgergen.
Abylaı bolashaq jary Farızamen ol WhatsApp messendjeri arqyly tanysyp, jarty jyldaı sóılesip júrgen. Onda kózi kórmeıtinderdiń toby bar. Sezimderiniń odan ári órshı túsýine Almaty qalasyndaǵy shıpajaıdaǵy ekeýiniń demalysy sebepshi boldy.
«Demalyp Atyraýǵa kelgennen keıin áke-shesheme osy qyzǵa úılenetinimdi aıttym. Ózimnen buryn ata-anam ýaıymdady. «Óziń de birinshi top múgedegisiń, erteńgi kúni qalaı bolar eken. Bul qadam - úlken jaýapkershilik», - dedi. Aqyrynda ata-anamdy kóndirip, sodan úlkenderdiń batasyn alyp, Almatyǵa attandym. Farızanyń ata-anasynyń ruqsatymen ony Atyraýǵa alyp keldim. Ata-anam Farızany kórdi, unatyp ta úlgerdi, qolynan sháı ishti. Qazir toıǵa qyzý daıyndyq ústinde», - deıdi Abylaı.
Al Farızanyń ata-analary atyraýlyq jigitke turmysqa shyǵýyna birden kelise qoımaǵan.
Farıza 14 jasqa deıin kórip kelip, keıin múlde qarańǵylyq basyp ketken. Otbasyndaǵy basqa balalarda da kózdiń kórýinen problema bar.Sondyqtan ol ákesi jaǵynan tuqym qýalaýshylyq bar dep oılaıdy. Sebebi anasynyń kózi kóredi. Farızaǵa kádimgi mektepti tastap, zaǵıptar jáne kózderi nashar kóretin balalarǵa arnalǵan mektep-ınternatqa oqýǵa túsýine týra keldi. Ony támamdap shyqqan soń Sport jáne týrızm akademııasyna massajıst mamandyǵyna tapsyrdy. Qazir akademııanyń ekinshi kýrsynda bilim alýda.
«Buryn turmys quramyn ba dep ýaıymdaıtynmyn. Abylaı sııaqty jigitti kezdestirip, óz baqytymdy tapqanyma qýanyshtymyn. Kóńilinen shyǵýǵa tyrysyp júrmin. Tek ázirge Atyraýdyń kóshelerimen óz betimmen serýendep júre almaımyn. Almatyda arnaıy taıaǵymmen qoǵamdyq kólikpen oqýyma baryp kelip, saıabaqtarǵa jıi shyǵyp turatynmyn. Ol jaqta jaıaý júrginshiler joldary júrýge yńǵaıly, sóıleıtin baǵdarshamdar da bar», - deıdi Farıza.
Jastar Abylaı qolyna dıplomyn alǵan soń aýylǵa kóship barýdy josparlap otyr. Óıtkeni ol shańyraqtaǵy jalǵyz ul. Abylaı sport pen ónerdi de qatar alyp júrgisi keledi. Ekeýi de erteń qolǵabys bolatyn kóp balalarymyz bolsa dep armandaıdy...
