Atyraýda qoımadan ondaǵan jylý batareıasy men eseptegishter urlaǵan kúdiktiler ustaldy

ATYRAÝ. QazAqparat – Atyraýda qoımadan jylý batareıasy men eseptegishterdi urlaǵan kúdiktiler ustaldy. Shyǵynnyń mólsheri – 5 mln 325 myń teńge, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, №1 Atyraý qalalyq polıtsııa bólimine shahar turǵyny qoımaǵa ury túskeni týraly shaǵym bergen.

«Polıtsııa qyzmetkerleri atalǵan derekke qatysty jedel izdestirý is-sharasyn ótkizdi. Qoımadan shaǵymdanýshyǵa tıesili 87 dana jylý batareıasy, 15 qorapqa salynǵan 10 dana gaz eseptegishi men 20 dana sý eseptegishi urlanǵanyn anyqtady. Jábirlenýshige keltirilgen materıaldyq shyǵynnyń mólsheri 5 mln 325 myń teńgeni qurady», - dep habarlady departamenttiń baspasóz qyzmeti.

Qazir atalǵan urlyqqa qatysy 1992, 2001 jáne 2003 jyly týǵan kúdiktiler anyqtalyp ustaldy. Kúdiktilerge qatysty QR Qylmystyq kodeksiniń 188-babynyń 3-bóligimen sotqa deıingi tergeý amaldary júrgizilip jatyr.

Ózge aqparat QR Qylmystyq protsesstik kodeksiniń 201-babyna sáıkes jarııalaýǵa jatpaıdy.

Eske sala ketelik, budan buryn Atyraýda otyz adamǵa kredıt aldyryp, 40 mln teńgeni qaltasyna basqan alaıaq ustalǵanyn habarlaǵan bolatynbyz. Alaıaqtyq ispen aınalysqan kúdikti 2022 jylǵy jeltoqsannan beri Kaspi Bank jáne Freedom Finance bankten taýarlyq nesıeni aqshalaı alyp, ústine bonýs qosyp beremin dep 30 adamdy aldaǵan. Sóıtip, 40 mln teńgeni ıemdenip ketkeni anyqtalǵan.

Qazir alaıaq ustaldy. Kúdikti ýaqytsha ustaý ızolıatoryna qamaýǵa alyndy.