Atyraýda kovorkıng ortalyǵy ashyldy

ATYRAÝ. QazAqparat - Atyraýda «Nur Otan» partııasy oblystyq fılıalynyń qoldaýymen balalarǵa arnalǵan kovorkıng ortalyǵy ashyldy, dep habarlaıdy QazAqparat tilshisi.

«Bul ortalyq 1 maýsym Balalardy qorǵaý kúni qarsańynda ashylyp otyr. Ǵabdol Slanov atyndaǵy oblystyq ǵylymı-ámbebap kitaphanasy bazasynda boı kótergen ortalyq «Nur Otan» partııasynyń «Qazaqstan kitaphanalary» jobasy aıasynda júzege asyrylyp otyr. Kovorkıng ortalyǵy kitaphanaǵa kelgen ár januıanyń súıikti demalys ornyna aınalady dep kútilýde. Ortalyq zamanýı úlgide jabdyqtalǵan. Balalardyń bos ýaqyttaryn tıimdi ótkizýge barlyq jaǵdaılar jasalǵan», - deıdi saıası uıymnyń oblystyq fılıalynyń baspasóz hatshysy Elmıra Tuńǵatarova.

Óńirge tanymal qolóner sheberi Qalıma Aıbekova ortalyqta aptasyna bir ret sheberlik sabaǵyn ótkizýdi josparlap otyr.

«Nur Otan» partııasynyń bul erekshe jobasyn tolyqtaı qoldaımyn. Bul rýhanı azyqtan alystap bara jatqan óskeleń urpaqty kitap oqýǵa baýlýdyń taptyrmas joly», - deıdi ol.

Kitaphanalarda jastarǵa arnalǵan qyzyqty lektsııalar uıymdastyrylyp, pikirtalas alańdary jáne taǵy basqa ıgi bastamalar qyzmet etetin bolady. Al ata-analarymen kelgen balalar úshin toǵyzqumalaq, shahmat, qyzyqty logıkalyq oıyndar, sheberlik synyptary uıymdastyrylady.

Aıta ketý kerek, jańa partııalyq joba otandyq kitaphanalardy zamanaýı bilim ortalyqtary retinde qaıta qurýdy, ıaǵnı biryńǵaı onlaın kitaphana júıesin qalyptastyryp, elimizdegi barlyq kitap qoryn elektrondy formatqa kóshirýdi kózdeıdi.

3 myńnan astam kitap qory bar kitaphanada ashylǵan kovorkıng ortalyǵy dúısenbiden - jeksenbige deıin demalyssyz, saǵat 9.00-den 18.30-ge jumys jasaıtyn bolady.