Atyraýda kovıd taksı 60-tan astam turǵynǵa qyzmet kórsetti
ATYRAÝ. QazAqparat – Atyraýda kovıd taksı 60-tan astam turǵynǵa qyzmet kórsetti, dep habarlaıdy QazAqparat.
Oblystyq jedel járdem stansasy dırektorynyń mindetin atqarýshy Nargız Baımoldaevanyń málimetine qaraǵanda, júrgizýshi men feldsher mamanynan turatyn COVID-taksı qyzmetine Atyraý men Qulsary qalasynda 7 brıgada jumyldyrylǵan.
«Kovıd taksı barlyq qajetti medıtsınalyq qurylǵylarmen qamtamasyz etildi. Sondaı-aq, júrgizýshiler jeke qorǵanysh kıimderin paıdalanyp, naýqasqa kómek kórsetý tásilin biledi. Qajettilik týyndaǵan mezette olar feldsherge járdemdese alady», - dedi Nargız Baımoldaeva.
Qazir kovıd taksı brıgadasy túngi aýysymda jumys isteıdi. Turǵyndar bul qyzmet túrine keshki saǵat 17:00-den tańǵy 09:00-ge deıin júgine alady.
«Eger qajettilik týyndap jatsa, onda kovıd taksı brıgadasynyń sany ulǵaıyp, táýlik boıy qyzmet etedi. Degenmen, qazirgi ýaqytta kúndizgi brıgadanyń ózi jumysty atqaryp jatqandyqtan, oǵan negiz joq. Kórsetilgen ár qyzmetten keıin kólikter mindetti túrde tazartylyp, óńdeledi», - dedi Nargız Baımoldaeva.
Onyń aıtýynsha, COVID-taksı feldsheri naýqastarǵa em taǵaıyndaý paraǵyn toltyrmaıdy. Shuǵyl aýrýhanaǵa jatqyzylýy tıis azamattar bolsa, ony aýrýhanaǵa jetkizý úshin jedel járdem brıgadalary shaqyrylady. Qazir atalǵan qyzmet túrin oblystyq densaýlyq saqtaý basqarmasy qarjylandyrýda. COVID-taksı brıgadasy aqysyz qyzmet kórsetedi.
Buǵan qosa, Atyraý oblysynda 36 tájirıbeli dárigerden quralǵan call-ortalyq ashylǵan bolatyn. Munda mamandar táýligine 24 saǵat koronavırýstyń jeńil túrine jáne vırýs ınfektsııasyna shaldyqqan naýqastarǵa úıden emdelýge qatysty onlaın keńes beredi. Bul ortalyqtyń ashylýymen jedel járdem shaqyrtýshylar sany 1300-den 900-ge deıin azaıdy.
Eske sala ketelik, budan buryn elimizde alǵash ret Atyraýda kovıd taksı jumys isteı bastaǵan edi.
