Atyraýda kóshi-qon zańnamasyn buzǵan 900 sheteldik ákimshilik jaýapqa tartyldy
Oblystyq polıtsııa departamenti baspasóz qyzmetiniń málimetine súıensek, kóshi-qon zańnamasyn buzǵan sheteldikter 27 maýsym-4 shilde aralyǵynda anyqtalǵan.
«Atyraý oblysynyń aýmaǵynda «Zańsyz kelýshi-2022» jedel aldyn alý is-sharasy ótti. Maqsat – zańsyz kóshi-qon aǵynynyń aldyn alý, jolyn kesý maqsatynda sheteldikter men azamattyǵy joq adamdar tarapynan Qazaqstan Respýblıkasynda bolý qaǵıdalaryn buzý deregin anyqtaý. Atalǵan is-shara kezinde elimizdiń kóshi-qon zańnamasyn buzǵany úshin 1 486 adam ákimshilik jaýapkershilikke tartyldy. Onyń ishinde 900 sheteldik azamat bar», - dep habarlady departamenttiń baspasóz qyzmeti.
Sot sheshimimen kóshi-qon zańnamasyn buzǵan 25 sheteldik Qazaqstan Respýblıkasynyń aýmaǵynan shyǵaryldy.
Sondaı-aq, qazaqstandyq 587 azamat sheteldik jumys kúshin tartýda «QR Halyqtyń kóshi-qony týraly» Zańy talabyn buzǵany belgili boldy. Olarǵa qatysty ákimshilik hattamalar toltyryldy.
Atyraýlyq polıtsııa qyzmetkerleri óńirdegi qurylys nysandarynda Ózbekstan Respýblıkasynyń azamattyǵy bar 117 adamnyń qujatsyz ári zańsyz jumys istegenin anyqtady. Onyń ishinde 13 ózbekstandyq Jylyoı aýdanyndaǵy ortalyq aýdandyq aýrýhananyń qurylys nysanyna jumysqa tartylǵan. Sheteldikterge qatysty QR Ákimshilik quqyqbuzýshylyq týraly kodeksiniń 517-baby 5-bóligimen ákimshilik hattama toltyrylyp, jınaqtalǵan is-qujattar aýdandyq sotqa joldandy.
Al, qurylys salasyndaǵy seriktestik basshylarynyń ózbekstandyqtardy qabyldap, sheteldik jumys kúshin zańsyz tartqany dáleldendi. Osyǵan baılanysty seriktestik basshylaryna atalǵan kodekstiń 518-babynyń 1-bóligimen jáne 519-babynyń 1-bóligimen ákimshilik hattama toltyryldy.
Qazir shetel azamattary qabyldaý-taratý ortalyǵyna ornalastyryldy.
Eske sala ketelik, budan buryn Atyraýda esirtki prıtonyn uıymdastyrǵan ózbekstandyq áıel ustalǵan bolatyn.