Atyraýda kóshi-qon zańnamasyn buzǵan 300-den astam sheteldik jaýapqa tartyldy
Oblystyq polıtsııa departamenti baspasóz qyzmetiniń málimetinshe, «Mıgrant» jedel-profılaktıkalyq is-sharasy ótkizildi.
«Іs-sharanyń maqsaty – zańsyz kóshi-qondy uıymdastyrýshylar men onyń arnalaryn anyqtaý, jolyn kesý, sheteldikterdiń kóshi-qon zańdylyqtaryn saqtaýyna baqylaý júrgizý. Sot sheshimderimen Qazaqstan Respýblıkasynan tysqary shyǵarylǵan jáne elimizde bolý merzimin buzǵan sheteldikterge qatysty sharalar qabyldaý. Atalǵan is-shara kezinde kóshi-qon zańnamasyn buzǵan 300-den asa adam ákimshilik jaýapkershilikke tartyldy. Onyń ishinde 211 sheteldik halyqtyń kóshi-qony zańnamasyn buzǵany úshin jaýapqa tartyldy. QR Ákimshilik quqyq buzýshylyq týraly kodeksiniń 518-babymen 126 azamatqa, 519-baby boıynsha 7 azamatqa qatysty ákimshilik hattama toltyryldy», - deıdi oblystyq polıtsııa departamenti bastyǵynyń birinshi orynbasary, polıtsııa polkovnıgi Ábdiǵanı Seıdýalıev.
Onyń aıtýynsha, quqyq buzýshylyq jasaǵan 37 shetel azamaty azamattyq is júrgizý jáne ákimshilik tártibimen el aýmaǵynan shyǵaryldy. Al, jeke basyn anyqtaıtyn qujattardyń bolmaýyna baılanysty Ózbekstan Respýblıkasynyń 61 azamaty qabyldaý-taratý ornyna ornalastyrylǵan.
Eske sala ketelik, budan buryn Atyraýda mas júrgizýshi qoqys tasıtyn kólikpen turǵyn úıdiń qorshaýyna soǵylǵanyn jazǵan edik. Keıin qoqys tasıtyn kólikti Ózbekstan Respýblıkasynyń azamaty júrgizgeni anyqtaldy . Sot qaýlysymen sheteldik júrgizýshi 20 táýlikke qamaýǵa alynyp, 7 jyl merzimge kólik quralyn basqarý quqyǵynan aıryldy.