Atyraýda kóshi-qon zańnamasyn buzǵan 11 sheteldik el aýmaǵynan qýyldy

ATYRAÝ. QazAqparat – Atyraýda kóshi-qon zańnamasyn buzǵan 11 sheteldik el aýmaǵynan shyǵaryldy, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, 19 maýsymnan beri «Zańsyz kelýshi-2023» jedel-profılaktıkalyq is-sharasy ótkizilip jatyr.

«Іs-sharany ótkizýdegi maqsat – elden shyǵaryp jiberý týraly sot sheshimin oryndamaǵan sheteldikterdi anyqtaý, zańsyz kóshi-qon faktileriniń, ıaǵnı, ákimshilik jáne qylmystyq jaýapkershilikke ákep soǵatyn kóshi-qon zańnamasyn buzýdyń aldyn-alý. Eki kúnde kóshi-qon zańnamasyn buzǵan 231 adam ákimshilik jaýapkershilikke tartyldy. Onyń bári ishinde QR Ákimshilik quqyq buzýshylyq týraly kodeksiniń 517-babyndaǵy 3, 4, 5, 6 jáne 7-bóliginiń talabyn saqtamaǵan. Al, 95 adamǵa atalǵan qujattyń 518-babymen, 8 adamǵa 519-babymen ákimshilik hattama toltyryldy. Kóshi-qon zańdylyǵyn buzǵany úshin 11 sheteldik el aýmaǵynan shyǵaryldy. Eki sheteldikke qatysty QR Qylmystyq kodeksiniń 392-babymen qylmystyq is qozǵaldy», -dep habarlady departamenttiń baspasóz qyzmeti.

Eske sala ketelik, buǵan deıin Atyraýda 2018 jyldan beri halyqaralyq izdeýde júrgen sheteldik ustalǵanyn habarlaǵan bolatynbyz.

Atyraý qalalyq polıtsııa basqarmasy kóshi-qon qyzmeti bóliminiń qyzmetkerleri 2018 jyldan beri halyqaralyq izdeýde júrgen Ózbekstan Respýblıkasynyń 1981 jylǵy azamatyn ustady.

Sheteldik 2023 jyldyń 3 maýsymynda Qazaqstan shekarasynan ótken. Atyraý qalalyq kóshi-qon qyzmeti bólimine jumysqa ornalasý úshin qujat tapsyrýǵa kelgen.

Polıtsııa qyzmetkerleri shetel azamatynyń jeke basyn jan-jaqty tekserý kezinde halyqaralyq izdeýdegi kúdikti ekenin anyqtaldy.

Ózbekstan Respýblıkasynyń azamatyna 2018 jyly Reseı Federatsııasy Qylmystyq Kodeksiniń 322-babynyń 1-bóligimen halyqaralyq izdeý jarııalanǵan.