Atyraýda kóshi-qon ortalyǵy ashyldy

ATYRAÝ. QazAqparat - Atyraýda «Biryńǵaı tereze» qaǵıdasy boıynsha eńbek mıgranttaryna qyzmet kórsetetin ortalyq ashyldy, dep habarlaıdy QazAqparat tilshisi.  

Jańa ortalyqta sheteldikterdi tirkeý, vızalyq qoldaý máseleleri, azamattyǵy,  turaqty turatyn jeri týraly anyqtama  berý syndy qyzmetter kórsetiletin bolady.

«Bul bizdiń aımaqqa kelgen shetel azamattarynyń derekterin óńdeý úderisin jyldamdatady. Buryn sheteldik azamattar  Qazaqstanǵa jumysqa ornalasý  úshin ruqsatty  bes kún ishinde alatyn bolsa, qazir eńbek mıgranttarynyń barlyq qujattary tártipke sáıkes kelse bul jumys bir saǵattan aspaıtyn boldy», - deıdi Atyraý oblysy Іshki ister departamenti bastyǵynyń orynbasary Berik Amangeldi.

Kóshi-qon qyzmetteriniń ortalyǵynda medıtsınalyq tekserý, saýsaq izderi, saqtandyrý polısin berý, sondaı-aq JSN alý, Qazaqstanǵa jumysqa ornalasý úshin qajetti barlyq rásimderden ótedi.

Aıta keteıik, sońǵy jyldary Atyraýda sheteldik jumys kúshiniń aǵymy aıtarlyqtaı ósti. Tek bıyl Atyraý oblystyq ishki ister departamenti  75 503 sheteldik azamatty ýaqytsha tirkeýge aldy. Qazaqstanda jumys isteýge jáne onyń ýaqytyn sozýǵa  jyl basynan beri 55 myńǵa jýyq sheteldik azamat ótinish bergen.

Kóshi-qon ortalyǵynda jumys isteý úshin ІІD Kóshi-qon qyzmetiniń 5 qyzmetkeri jáne «Azamattarǵa arnalǵan Úkimet» AQ-nyń 10 qyzmetkeri taǵaıyndaldy.