Atyraýda Kóshi-qon qyzmeti ortalyǵyn salý usynyldy
ASTANA. QazAqparat - QR Іshki ister mınıstri Berik Bısenqulov Atyraý oblysyna jasaǵan jumys sapary barysynda óńir ortalyǵynda ornalasqan birqatar nysan qurylysymen tanysty, dep habarlaıdy QazAqparat.
QR ІІM baspasóz qyzmetiniń aqparatyna sáıkes, ol Atyraý oblystyq ІІD jáne Mamandandyrylǵan halyqqa qyzmet kórsetý ortalyǵynyń jańa ǵımaratynda boldy. Oblystyq ІІD basshylyǵy óńirge jyl saıyn shamamen 60 myń sheteldik jumys kúshine kvota beriletindigin aıta kele, Kóshi-qon qyzmeti ortalyǵyn salý úshin qarjylyq múmkinshilikterdi qarastyrýdy usyndy.
Atyraý oblystyq ІІD bastyǵy Aıan Dúısembaev óńirdegi qylmystyq ahýaldyń turaqty ekendigin, ótken jyldyń qorytyndysynda qylmys deńgeıiniń tómendegenin atap ótti. Oblysta qylmystyń aldyn alýǵa baǵyttalǵan nátıjeli jumystar júrgizilgen. Shaǵyn qalalardy damytý memlekettik baǵdarlamasy aıasynda Jylyoı aýdanynda jedel basqarý ortalyǵynyń qurylysy jalǵasýda. Jergilikti polıtsııa qyzmetiniń materıaldyq-tehnıkalyq bazasy kúsheıtildi.
Óz kezeginde oblystyq departament qyzmetiniń oń nátıjelerin atap ótken Berik Bısenqulov óńirlik polıtsııa qyzmetkerleriniń barlyq kúsh-jigeri asa aýyr qylmystardy ashýǵa baǵyttalýy tıistigin basa aıtty.
«Tirkelgen qylmystardyń negizgi bóligin uıaly telefon, páter urlyǵy sekildi ózgeniń múlkin urlaý qurap otyr. Ol úshin 2018-2020 jyldarǵa arnalǵan QR ІІM baǵdarlamasy qabyldanǵan. Qylmystyń aldyn alý jumystary kúsheıtilýi tıis. Ásirese, bul jumystar jastar arasynda qarqyndy júrgizilýi qajet», - dedi ol.
Aǵymdaǵy jyly urlyqtyń aldyn alýǵa baǵyttalǵan jumystarǵa jańadan ashylatyn 34 polıtsııanyń ýaskelik pýnkti járdem beretin bolady. Atalǵan pýnktiń 20-syn Atyraý qalasynyń jańa aýdandarynda ashý josparlanǵan.
Sonymen qatar Berik Bısenqulov QR Іshki ister mınıstriniń talabyna sáıkes aǵymdaǵy jyly ishki ister bólimderi júıesiniń qyzmeti el Prezıdentiniń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda aıqyndalǵan mindetterdi tabysty júzege asyrýǵa jaǵdaı jasaýǵa basa nazar aýdarýy tıistigin basa aıtty.
«Azamattardyń konstıtýtsııalyq quqyqtary men erkindiginiń naqty saqtalýyn qamtamasyz etý jumystaryn jalǵastyrý qajet», - dedi Berik Bısenqulov.
