Atyraýda qosalqy stansadaǵy órttiń kesirinen 8 myń abonent jaryqsyz qaldy
Oblys ákiminiń baspasóz qyzmetinen málim etkendeı, Atyraý qalasynyń birneshe shaǵyn aýdanynda elektr energııasynyń óship qalýyna №18 qosalqy elektr stansasynyń órtenýi sebep bolǵan.
«Atyraý-Jaryq» AQ prezıdentiniń orynbasary Meıirbek Ǵubashevtyń málimetinshe, búgin jergilikti ýaqytpen saǵat 11:00-degi málimetke sáıkes Atyraý qalasyndaǵy Geolog, Juldyz, Birlik, Tomarly jáne Konteıner shaǵyn aýdandarynda elektr qýaty sóndirilgen. Sol sebepten, 8000 jeke, 700 zańdy tulǵa elektr qýatynsyz otyr.
«Qazir Atyraý qalasynda órtengen kabelderdi aýystyrý jumystary júrip jatyr. Bul jumysqa 42 adam tartyldy. Osy ýaqytqa deıin Atyraý qalasyndaǵy Vokzalmańy shaǵyn aýdanynnda elektr energııasy berý qalpyna keltirildi. Órttiń sebebin anyqtaý úshin arnaıy komıssııa quryldy. Oǵan jańbyr sebep bolýy múmkin emes ekenin atap ótkim keledi. Óıtkeni, kabeldik kanal betonnan jasalǵan. Bári qurǵaq, sý tımegen. Ony ózim tekserdim. Keshke deıin barlyq shaǵyn aýdanda elektr energııasyn qosýdy josparlap otyrmyz», -dedi Meıirbek Gýbashev.
Atyraý qalalyq bilim bóliminiń basshysy Farýza Shangereevanyń aıtýynsha, qosalqy elektr stansasyndaǵy apatqa baılanysty búgin 1062 mektep jasyna deıingi bala balabaqshaǵa barmaǵan.
«Búgin №26, 33, 35, 36 jáne «Shaǵala» balabaqshasynda jaǵdaıǵa baılanysty sabaqtar toqtatyldy. Mektepterdiń 6869 oqýshysy qashyqtan oqıdy. Erteń elektr energııasy qalpyna kelgennen keıin oqý protsesi shtattyq rejımde jalǵasady», -dedi Farýza Shangereeva.
Eske sala ketelik, budan buryn Atyraýda elektr energııasynyń óshýinen mektepter onlaın oqýǵa kóshirilgenin, keıin Atyraý jaryqsyz qalyp, tótenshe jaǵdaı sebebi atalǵanyn jazǵan edik.