Atyraýda koronavırýstyń ekinshi tolqynyna daıyndyq talqylandy
ATYRAÝ. QazAqparat – Atyraý oblysynyń ákimi Mahambet Dosmuhambetovtiń tóraǵalyǵymen ótken selektorlyq keńeste aımaqtyń koronavırýs indetiniń ekinshi tolqynyna daıyndyǵy talqylandy, dep habarlaıdy QazAqparat óńirlik kommýnıkatsııalar qyzmetine silteme jasap.
Qazir óńirde epıdemıologııalyq ahýal turaqtaldy. Soǵan qaramastan daıyndyq jumystary kúsheıtilgen. Oblystyq densaýlyq saqtaý basqarmasynyń basshysy Nurlybek Qabdyqaparovtyń málimdeýinshe, koronavırýstyń ekinshi tolqynyna jan-jaqty daıyndyq jumystary júrgizilýde. Medıtsınalyq uıymdar men dárihanalarda dári- dármek qory jetkilikti. Oblystyq densaýlyq saqtaý basqarmasy tumaýǵa qarsy ekpe júrgizý úshin 60 myń doza vaktsına satyp alyp, qazir ekpe júrgizý bastaldy.
«Oblystyń medıtsınalyq uıymdary naýqastarǵa kómek kórsetý úshin 224 IVL apparatymen, 27 rentgen apparatymen, 10 kompıýterlik tomografııa apparatymen, 977 ottegi generatorymen jáne 1100 pýlsoksımetrmen qamtamasyz etildi. Koronavırýstyń ekinshi tolqyny oryn alǵan jaǵdaıda oblysta 2080 ınfektsııalyq kerýet, onyń ishinde 120 reanımatsııalyq kerýet jasaqtaý josparlandy. Budan basqa, shalǵaı eldi mekenderde ornalasqan turǵyndardy medıtsınalyq kómekpen qamtamasyz etý úshin óńirge 7 jyljymaly medıtsınalyq pýnkt keledi dep kútilýde», - dedi Atyraý oblystyq Densaýlyq saqtaý basqarmasynyń basshysy Nurlybek Qabdyqaparov.
Sonymen qatar, búginde oblystyń emdeý-saýyqtyrý uıymdary jeke qorǵanysh quraldarynyń 2 aılyq qorymen qamtamasyz etilgen. Demeýshilik kómek arqyly alynǵan 8 avtokólik oblystyń medıtsınalyq uıymdaryna taratyldy.
Budan basqa, qazan-qarasha aılarynda lızıng arqyly 40 sanıtarııalyq avtokóliktiń jetkiziletini kútilýde. Oblysta 8 medıtsınalyq uıymǵa ortalyqtandyrylǵan ottegi stantsııasyn ornatý josparlanǵan bolsa, búginde 6 stantsııanyń qurylys montaj
jumystary júrgizilýde.
Jıyn barysynda dári-dármekterdiń tapshylyǵyn boldyrmaý, karantın kezinde toı, eske alý syndy otbasylyq jıyndarǵa toqtaý salý, dezınfektsııa jumystaryn kúsheıtý, sonymen qatar, karantın jaǵdaıyndaǵy kásipkerlik nysandardyń jumysyn jalǵastyrý syndy máseleler de talqylandy.
«Búginde aımaqtaǵy epıdemıologııalyq ahýal turaqtandy. Soǵan qaramastan oblysta koronavırýs ınfektsııasymen kúres áli de jalǵasýda. Turǵyndar arasynda aqparattyq- nasıhattyq jumystaryn odan ary kúsheıtýimiz qajet. Koronavırýs indetiniń birinshi tolqyny kezinde naýqas adamdardy emdeýge arnalǵan tósek oryndardyń tapshylyǵy anyq baıqaldy. Osy máseleni sheshý baǵytynda Atyraý qalasynda 200 oryndyq, al Jylyoı aýdanynda 275 oryndyq aýrýhanalardyń qurylysy júrgizilýde. Qurylys jumystary jýyq arada aıaqtalýy tıis», - dedi Mahambet Dosmuhambetov.
Sondaı-aq, oblys ákimi Atyraý qalasynda salynyp jatqan modýldi tıptegi juqpaly aýrýlar aýrýhanasynyń qurylysyn ýaqytynda aıaqtaýdy, medıtsınalyq qural-jabdyqtarmen tolyqtaı qamtamasyz etý máselesin oblystyq densaýlyq saqtaý basqarmasy men qurylys basqarmasyna jiti qadaǵalaýdy tapsyrdy.
Jıyn sońynda óńir ákimi Mahambet Dosmuhambetov epıdemıologııalyq jaǵdaıdy baqylaýda ustap, sanıtarlyq normalardy qatań saqtaýdy, koronavırýstyq ınfektsııanyń taralýy men aýrý kórsetkishteriniń ósimi baıqalǵan jaǵdaıda jedel sharalardy qabyldaýdy, sondaı-aq, barlyq sanattaǵy medıtsınalyq qyzmetkerlerdiń qaýipsizdigin qamtamasyz etýdi júktedi.
