Atyraýda koronavırýspen kúreske 1 mlrd teńgeden astam qarjy jumsaldy
ATYRAÝ. QazAqparat – Atyraýda koronavırýspen kúreske 1 mlrd teńgeden astam qarjy jumsaldy, dep habarlaıdy QazAqparat.
Bul týraly búgin Atyraý oblysynyń ákimi Mahambet Dosmuhambetov onlaın brıfıngte málim etti.
«Koronavırýs ınfektsııasymen kúreske respýblıkalyq bıýdjetten 500 mln teńge bólindi. Shamamen osynsha kólemdegi qarjy jergilikti bıýdjetten de qaraldy. Bul qarajat maqsatty túrde jumsaldy», - dedi oblys ákimi.
Ákimniń aıtýynsha, demeýshiler, kásipkerler sondaı-aq, kásiporyndar men kompanııalar da kómek kórsetken. Demeýshilik qoldaýdyń nátıjesinde qajetti medıtsınalyq qural-jabdyq, jeke qorǵanys quraldary, dári-dármek satyp alynǵan.
«Qonaq úıde jatyp jumys istegen medıtsına qyzmetkerleri, karantınde jatqan azamattar úshin jatyn orynnyń aqysy tólendi. Ýaqytyly tamaqtandyrý uıymdastyryldy. Bastapqyda 180 ınfektsııalyq oryn jasaqtalsa, qazir ol 540 orynǵa deıin kóbeıtildi. Sondaı-aq, 300-den asatyn provızorlyq oryn, 2000-nan astam karantındik oryn jasaqtaldy», - dep atap ótti Mahambet Dosmuhambetov.
