Atyraýda koronavırýspen aýyrǵan sońǵy naýqas emdelip shyqty
Atyraýdaǵy modýldi aýrýhanaǵa 70 jastaǵy zeınetker Sáýle Joldybaeva 16 naýryzda túsken. Onyń ókpesiniń 40%-y zaqymdanǵan. Aýrýhanada 10 kún em qabyldaǵan.
«Aýrýhanaǵa túskennen beri dárigerler men medbıkeler tıisti kómegin kórsetti. Ár naýqastyń saýyǵyp shyǵýy úshin ýaqytpen sanaspaı, eńbek etip júrgen aýrýhana ujymyna aıtar alǵysym sheksiz. Bastysy, qaýipti indet joıylyp, qalypty ómirge oralsaq eken degen tilegim bar», - deıdi Sáýle Joldybaeva.
Oblystyq densaýlyq saqtaý basqarmasynyń basshylary 2020 jyldyń 27 naýryzynda alǵashqy naýqasty qabyldaǵan medıtsına qyzmetkerleriniń eńbegin atap ótip, qyzmetkerlerge alǵys hattar tabystady.
«Qazir oblysta koronavırýs ınfektsııasyn juqtyryp, em qabyldap jatqan naýqas joq. Eki jylda qaýipti vırýstyń birneshe tolqyny, ártúrli mýtatsııaǵa ushyraǵan shtammy tirkeldi. Qaýipti indetpen kúres nátıjesin berip, qazir sońǵy naýqas aýrýhanadan shyqty», - dedi basqarma basshysynyń orynbasary Qaısar Abdalıev.
Onyń aıtýynsha, oblys ákimdiginiń qoldaýymen NCOC kompanııasynyń áleýmettik jáne ınfraqurylymdyq jobalary sheńberinde boı kótergen modýldi aýrýhanada dezınfektsııa jumystary júrgiziledi. Al, medıtsına qyzmetkerleri jumysyn jalǵastyra beredi.
