Atyraýda koronavırýspen aýyrǵan 30 naýqas jansaqtaý bóliminde jatyr
ATYRAÝ. QazAqparat – Atyraýda koronavırýs ınfektsııasymen aýyrǵan 30 naýqas jansaqtaý bóliminde jatyr, dep habarlaıdy QazAqparat.
Oblystyq Densaýlyq saqtaý basqarmasy baspasóz qyzmetiniń aqparatyna qaraǵanda, jansaqtaý bólimine túsken 30 naýqastyń 6-ýy ókpeni jasandy jeldetý apparatyna qosylǵan.
«Atyraý oblysyndaǵy ınfektsııalyq statsıonarlarda 397 naýqas em alyp jatyr. Statsıonarlarda 2 098 tósek-oryn bar. Qazir mundaǵy júkteme 18,9%-dy qurap otyr. Al, 81 tósek-orny bar jansaqtaý bólimine 30 naýqas emdelýde. Bul bólimdegi júkteme – 37,0%» -dep málim etti basqarmanyń baspasóz qyzmetinen.
Eske sala ketelik, budan buryn Atyraýda Ashyq qosymshasy «qyzyl» mártebeli 20 adamdy anyqtaǵan edi.
