Atyraýda koronavırýs juqtyrǵandardyń úsheýi Ystanbuldan ushyp kelgen

ATYRAÝ. QazAqparat – Atyraý oblysynda koronavırýs ınfektsııasyn juqtyrǵandardyń 3-eýi «Ystanbul-Atyraý» reısimen ushyp kelgendermen bir bortta bolǵan, dep habarlaıdy QazAqparat.

Bul reıs 27 naýryzda Atyraý áýejaıyna qonǵan bolatyn. Sol kúnnen beri jolaýshylardyń barlyǵy karantındik statsıonarǵa oqshaýlandy. Al, 1958 jyly týǵan er men áıel, sondaı-aq, 1981 jyly týǵan er adam ınfektsııalyq statsıonarǵa jatqyzyldy.

«Olar bekitilgen biregeı hattama boıynsha em alyp jatyr. Úsheýiniń de jaǵdaıy birqalypty. Qazir Atyraýda koronavırýs ınfektsııasy anyqtalǵan 39 adam em alyp jatyr. Sonyń ishinde 2 naýqastyń jaǵdaıy aýyr» dep habarlady óńirlik kommýnıkatsııalar qyzmeti.

Buǵan deıin Atyraý oblysynda koronavırýs juqtyrǵan 3 adamnyń anyqtalǵany jazylǵan edi.