Atyraýda koronavırýs juqtyrǵandar Amsterdam men Ystanbuldan kelgen
NUR-SULTAN. QazAqparat – Atyraý oblysynyń densaýlyq saqtaý basqarmasynyń basshysy Baıtolla Ǵazızov óńirde koronavırýs anyqtalǵan úsh adam týraly aıtty, dep habarlaıdy QazAqparat tilshisi.
«Ókinishke qaraı búgin 27 naýryz kúni Atyraý oblysynda koronavırýs ınfektsııasyn juqtyrǵan úsh adam anyqtaldy. Birinshi naýqas – 21 naýryzda Nur-Sultan qalasynan Atyraýǵa kelgen. 26 naýryzda JRVI belgilerimen odan analız alynǵan. Nátıjesinde ınfektsııa juqtyrǵany anyqtaldy. Ekinshi naýqas – 17 naýryz kúni Ystanbuldan Almatyǵa, osydan keıin Almatydan Atyraýǵa ushyp kelgen. Nur-Sultanda Ystanbuldan Almatyǵa kelgenderdiń arasynan ınfektsııa juqtyrǵan adam tabylǵanyn bilesizder. Soǵan baılanysty qarym-qatynasta bolǵandardan biz keshe analız aldyq. Nátıjesinde Atyraýǵa kelgen adamnyń ınfektsııa juqtyrǵany anyqtaldy», - dedi Baıtolla Ǵazızov «Habar 24» arnasynda onlaın rejımde ótken baspasóz máslıhatynda.
Úshinshi naýqas – Amsterdamnan keshe Atyraýǵa kelgen.
«Ol naýqas birden karantınge jatqyzylyp, analız alynyp, test nátıjesi onyń da ınfektsııa juqtyrǵanyn anyqtaǵan. Úsh naýqastyń da jaǵdaıy qazirgi tańda qanaǵattanarlyq. Tıisti hattamalarǵa saı emdeýge jatqyzylyp, em-dom jasalyp jatyr», - dedi ol.
