Atyraýda koronavırýs juqtyrǵan 385 adam oqshaýlandy

ATYRAÝ. QazAqparat – «Qyzyl» aımaqtaǵy Atyraý oblysynda bir táýlikte 98 adam koronavırýs ınfektsııasyn juqtyrdy, dep habarlaıdy QazAqparat.

Oblystyq Densaýlyq saqtaý basqarmasynyń baspasóz qyzmetinen málim etkendeı, ótken táýlikte 98 adamnan koronavırýs ınfektsııasy anyqtalǵan. Onyń ishinde 69 naýqas Atyraý qalasynda tirkelip otyr. Sondaı-aq, Teńiz kenishinde – 7, Jylyoı aýdanynda – 10, Isataıda – 3, Inderde – 2, Mahambette – 2, Qyzylqoǵada – 2, Maqat aýdanynda 2 adamnan qaýipti vırýstyń belgisi tabylǵan.

«Qazir 397 naýqas koronavırýstyq ınfektsııaǵa qarsy em qabyldaýdy jalǵastyryp jatyr. Onyń ishinde modýldik aýrýhanada – 161, №2 oblystyq aýrýhanada – 110, aýdandardaǵy statsıonarlarda – 77, Teńiz ken ornyndaǵy ınfektsııalyq statsıonarda 49 adam emdelýde. Al, úı jaǵdaıynda emdelý úshin 385 adam oqshaýlandy» -dep habarlady basqarmanyń baspasóz qyzmeti.

Eske sala ketelik, budan buryn Atyraý oblysynda koronavırýs juqtyrǵandar qaıta kóbeıgenin habarlaǵan edik.