Atyraýda koronavırýs juqtyrǵan 24 naýqas jansaqtaý bóliminde jatyr
Oblystyq densaýlyq saqtaý basqarmasy basshysynyń orynbasary Qaısar Abdalıevtyń málimetinshe, Atyraýda sońǵy úsh kúnde koronavırýs ınfektsııasyn juqtyrǵandar sany 35,9%-ǵa ósken.
Máselen, 28 maýsymda qaýipti vırýsty 66 adam juqtyrǵan. Al, keshe, 1 shildede 103 jaǵdaı anyqtalǵan.
«Qazir óńirde 2 098 tósektik 10 ınfektsııalyq statsıonar daıyndaldy. Onyń ishinde Atyraý qalasynda 460 tósek-orny bar 3 statsıonar, Teńiz ken ornynda 1 360 tósek-oryndyq statsıonar, 7 aýdanda 278 tósek-orynǵa arnalǵan statsıonar jumys isteıdi. Al, reanımatsııalyq tósek-oryn sany – 81. Buǵan qosa, 750 tósek-oryndyq qosymsha rezervtik ınfektsııalyq statsıonar daıyn tur» -deıdi Qaısar Abdalıev.
Onyń aıtýynsha, oblystaǵy ınfektsııalyq statsıonarlarda 437 patsıent em alyp jatyr. Statsıonarlardaǵy tósek-oryn júktemesi 20,8% -dy qurap otyr.
«Modýldik aýrýhana naýqastarǵa 90%-ǵa toldy. Jansaqtaý bóliminde 24 patsıent jatyr. Onyń 20-synyń jaǵdaıy aýyr halde. Jaǵdaıy óte aýyr 4 naýqas ókpeni jasandy jeldetý apparatyna qosylǵan» - dedi Qaısar Abdalıev.
Eske sala ketelik, buǵan deıin Atyraýda koronavırýs juqtyrǵan 385 adam oqshaýlanǵanyn jazǵan bolatynbyz.