Atyraýda koronavırýs juqtyrǵan 15 júkti áıel ınfektsııalyq statsıonarda jatyr
Oblystyq densaýlyq saqtaý basqarmasynyń baspasóz qyzmetinen málim etkendeı, №2 oblystyq aýrýhananyń ınfektsııalyq statsıonarynda 42 naýqas emdelip jatyr. Onyń ishinde 15 júkti áıel, 10 eresek turǵyn men 7 bala bar.
«Bizdiń maqsatymyz – syrqatyna em izdep kelgen naýqastarǵa der kezinde kómek berý. Koronavırýs ınfektsııasyn juqtyrý belgisi baıqalsa, ýaqytyly dárigerdiń kómegine júginýge keńes beremin. Ásirese, balalar men júkti áıelderdiń ımýnıteti álsiz bolady. Sol sebepten, olar vırýs juqtyrýǵa beıim bolady», -deıdi ınfektsıonıst-dáriger Sholpan Qanatova.
Atyraý oblysynda ótken táýlik – 3 tamyzda COVID-19 ınfektsııasyn 63 adam juqtyrǵan. Qazir ınfektsııalyq statsıonarlarda em qabyldaý úshin 60 naýqas oqshaýlanǵan. Al, 898 adam úı jaǵdaıynda em alyp jatyr.
Qaýipti vırýstyń órshýine vaktsına alý, revaktsınalaý qarqynynyń tómendegeni áser etken. Osy kezge deıin vaktsınalardyń І komponentin 273 820 adam alǵan. Vaktsınalardyń ІІ komponentin 259 752 atyraýlyq ektirgen. Revaktsınalaýdan 105 421 adam ótken.
Pfizer ekpesiniń І komponentin 18 494, ІІ komponentin 15 634 adam saldyrǵan. Atalǵan vaktsınany 38 112 turǵyn revaktsına, 5 608 adam qaıtadan revaktsına retinde ektirgen.
«Emhanalarda egý pýnktteri vaktsına alýshylarǵa demalyssyz qyzmet etedi. Qazir óńirdegi medıtsına mekemelerinde Pfizer vaktsınasynyń I, II komponentteriniń, Vero Cell jáne QazVac vaktsınalarynyń revaktsınalaýǵa arnlaǵan dozalarynyń jetkilikti qory bar», -dep málim etti basqarmanyń baspasóz qyzmetinen.
Eske sala ketelik, buǵan deıin Atyraý oblysynda bir aptada koronavırýs juqtyrý kórsetkishi eki ese óskenin habarlaǵan bolatynbyz.
