Atyraýda koronavırýs ınfektsııasyn juqtyrý 9 protsentke ósken
ATYRAÝ. QazAqparat – Atyraýda toı-sadaqaǵa barýdyń saldarynan koronavırýs ınfektsııasy 9%-ke ósken, dep habarlaıdy QazAqparat.
Bul týraly oblystyń bas memlekettik sanıtar dárigeri Mádenıet Tanaýov málim etti.
Onyń aıtýynsha, naýqaspen jaqyn qarym-qatynasta bolǵannan 22,5%, qoǵamdyq kólikte júrýmen baılanysty 7,2%, adamdar kóp jınalatyn oryndarǵa barǵannan 26,9%, vahtalyq kentterde jumys isteıtinder arasynda, turatyn jerinde juqtyrý 43% quraǵan.
«Jyl basynan beri 6546 reıdtik tekserý ótkizilip, 27296 nysan qamtyldy. Monıtorıngtik toptar 213 quqyq buzýshylyqty anyqtady. Al, naýryzda anyqtalǵan 64 buzýshylyqqa qatysty shaǵyn jáne orta bıznes nysandaryna, jeke tulǵalarǵa 3 mln 853 myń teńgeniń 49 aıyppuly salyndy. Bul aıda adamdardyń otbasylyq sharalarǵa kóptep qatysýynan koronavırýs ınfektsııasy 18 paıyzdan 26,9 paıyzǵa joǵarylady» - dedi Mádenıet Tanaýov.
Oblys ákimi Mahambet Dosmuhambetov saqtyq sharalaryn kúsheıtip, baqylaýdy kúsheıtýdi tapsyrdy.
«Jaǵdaıdy qatań baqylaýda ustaý kerek. Qajet bolǵan jaǵdaıda belgilenge algorıtmge saı saqtyq sharalaryn kúsheıtýdi tapsyramyn. Árıne, óndiristi, shaǵyn jáne orta bıznesti órkendetý qajet. Alaıda, adam densaýlyǵy basty orynda ekeni basty nazarda bolǵany jón» - dedi Mahambet Dosmuhambetov.
Eske sala ketelik, buǵan deıin Atyraý oblysynda naýryzda 95 myń PTR-test júrgizilgenin habarlaǵan bolatynbyz.
