Atyraýda kópqabatty úıler aýlasynan kókqutan tabyldy
Jabaıy qustyń ý-shýy kóp qalaǵa kirýi sırek kezdesetin jaıt. Atyraý qalasyndaǵy Avangard-3 shaǵyn aýdanynyń turǵyn úı alabynda júrgen kókqutanǵa turǵyndar tańyrqaı qarady.
Oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Nurlan Imanǵalıevtiń aıtýynsha, jabaıy qusty Natalıa esimdi turǵyn ustap, úıine alyp ketken. Ol jabaıy qusty tabıǵı mekenine jetkizý úshin volonterlerden kómek suraǵan.
Al volonterler jabaıy qus týraly derekti atalǵan ınspektsııaǵa habarlaǵan. Inspektsııa mamandary onyń kókqutan ekenin anyqtady.
«Natalıa esimdi turǵynnyń jabaıy qusty úıine alyp ketkeni durys boldy. Óıtkeni, kóshede júrgen buralqy ıtter kókqutandy talap, óltirip tastaýy múmkin edi. Qazir jabaıy qustardyń túleıtin kezeńi ótip jatyr. Sol sebepten, qustardyń ushýy qıynǵa soǵady. Bizdiń mamandar kókqutandy tekserýden ótkizdi. Ol jaraqat almaǵan», - deıdi Nurlan Imanǵalıev.
Onyń aıtýyna qaraǵanda, ınspektsııa mamandary kókqutandy shahar mańyndaǵy kanalǵa jibergen. Tabıǵı mekendeý ortasyna uqsas kanalda kókqutannyń ál jınaýyna múmkindik bar. Kanaldan azyqty da taba alady.
Eske sala ketelik, buǵan deıin Atyraýda kópqabatty turǵyn úıdiń kireberisine qarshyǵa ushyp kirgenin jazǵan edik.
Kópqabatty turǵyn úıdiń kirebes dálizine kirgen qarshyǵa dalaǵa shyǵa almaı qalǵan. Ony jergilikti qutqarýshylar ustap alyp, erkindikke jiberdi.
