Atyraýda kópqabatty úıdiń shatyry qulaýyna baılanysty arnaıy keńes qurylady
ATYRAÝ. QazAqparat - Keńes músheleri shatyrdy qalpyna keltirý jáne keltirilgen shyǵyndardy óteý máselesin qarastyrady, dep habarlaıdy QazAqparat.
Atyraýda qatty jel saldarynan kópqabatty úı shatyrynyń qulaýy jaǵdaıyna oraı Atyraý qalasy ákimdiginde arnaıy keńes qurylady. Jańa qurylǵan keńes músheleri bıik ǵımarattyń shatyryn qalpyna keltirý, keltirilgen shyǵyndy retteý, sondaı-aq, tótenshe jaǵdaılardyń saldaryn joıý máselelerimen aınalysady.
Jel saldarynan aýmaǵy 125 tekshe metr bolatyn shatyr qulap, 3 kólik ıesi zardap shekkeni edi. Oqıǵa saldarynan jol ýchaskesi jabyldy, avtobýstar men avtokólikter aınalma jolmen júrip jatyr.
"A.Qunanbaev kóshesi, 19 mekenjaıynda ornalasqan úı 2012 jyly termojańǵyrtýdan ótken. Jóndeý-qaıta qalpyna keltirý jumystarynyń kepildik merzimi 2014 jyly ótelgen. Sondyqtan, bul jaǵdaıda merdiger mekemeni kinálaı almaımyz. Shatyr qulaýyna baılanysty barlyq máselelerdi zań turǵysynan qurylǵan arnaıy keńes sheshedi", - dep habarlady Atyraý qalasy ákiminiń orynbasary Ulyqbek Tnalıev.
Aıta keteıik, búgin 12 sáýir kúni tús ýaqytynda A.Qunanbaev kóshesindegi bes qabatty turǵyn úıdiń shatyryn jel ushyryp ketti. Shatyrdyń bir bóligi tómende turǵan úsh kólikke jáne ótpeli jolǵa qulady. Tótenshe jaǵdaı kezinde eshkim zardap shekken joq.
