Atyraýda kópqabatty úıdegi órtten 6 adam qutqaryldy
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, órt týraly habar saǵat 17:28-de túsken.
«Atyraý qalasynyń Vokzal mańy-5 shaǵyn aýdanynda ornalasqan bes qabatty úıdegi páterdiń balkony janǵan. Órt kezinde 38 turǵyn, onyń ishinde 21 eresek adam, 17 bala baspaldaq arqyly qaýipsiz jerge shyǵyp úlgergen. Kireberis dálizdi qoıý qara tútin basqan. Sol sebepten, órt sóndirýshiler avtosatynyń kómegimen 2-shi jáne 4-shi qabattyń páterlerindegi turǵyndar – 6 adamdy (3 eresek, 3 náreste) qutqardy. Apattar medıtsınasy ortalyǵynyń qyzmetkerleri qutqarylǵan turǵyndarǵa alǵashqy medıtsınalyq kómek kórsetti», -dep habarlady departamenttiń qoǵammen baılanys toby.
Jalynnyń saldarynan páterdiń balkonyna qoıylǵan turmystyq zattar janǵan. Órt sóndirýshiler jedel áreket etip, jalyndy sanaýly mınýtta sóndirdi.
Órtti sóndirýge Atyraý oblystyq tótenshe jaǵdaılar departamentiniń 10 qyzmetkeri men 3 tehnıka jumyldyryldy.
«Oblys turǵyndary men qonaqtaryna órt qaýipsizdik erejesin qatań saqtaýdy eskertemiz. Qaýipsizdik erejesin saqtamaýdan tutanatyn órttiń adam ómirine qaýip tóndiretinin, ókinishke uryndyratynyn esten shyǵarmaǵan jón», -dep málim etti departamenttiń qoǵammen baılanys tobynan.
Eske sala ketelik, budan buryn Kaspıı jaǵalaýynda 7 kúnge sozylǵan qamys órti sóndirilgenin habarlaǵan bolatynbyz.
«Qazaqstan Ǵarysh sapary» UK» AQ-nyń ǵarysh monıtorıngine negizdelgen «Aqjaıyq» memlekettik tabıǵı rezervatynyń aqparatyna sáıkes, qamys órtiniń jalpy aýdany 910 ga bolǵan. Órt sóndirýshiler 7 kún boıy otpen arpalysty. Kúnniń aptap ystyǵy men aýmaqtyń sýly, batpaqty jerinde qalyń ósken qamys órtin tez sóndirýge kedergi keltirgen.
