Atyraýda kópirden sekirgen júkti áıeldiń 4 qabyrǵasy synǵan
Buǵan deıin Atyraýda kópirden sekirip ketken júkti áıel qutqarylǵan bolatyn.
Oblystyq polıtsııa departamenti baspasóz qyzmetiniń málimetinshe, búgin, 7 jeltoqsan saǵat 9:20 shamasynda jedel basqarý ortalyǵynyń ınspektory beınebaqylaý kameralary arqyly Atyraý qalasyndaǵy «Turǵyn úı qalashyǵy – Avangard» shaǵynaýdandaryn jalǵaıtyn jaıaý júrginshiler kópirinde kúdik týdyrǵan áıeldi kórgen.
«Inspektorlar bul týraly jaqyn mańdaǵy patrýl polıtsııa qyzmetkerlerine habar bergen. Patrýldik polıtsııa batalonynyń rota komandıri, polıtsııa kapıtany Almas Zakarıev jaıaý júrginshiler kópirine baryp, sekirmek bolǵan azamatshany raıynan qaıtarǵysy kelgen. Biraq, júkti áıel polıtsııa qyzmetkerimen áńgimelespeı, sekirip ketken. Alaıda, oqıǵa ornyna der kezinde qaıyqpen jetken polıtsııa departamentiniń qyzmetkerleri, polıtsııa leıtenanty Jandarbek Jańbyrbaev pen polıtsııa serjanty Aıbat Jaýbaev kópirden sekirgen áıeldi qutqaryp qaldy», -dep málim etti departamenttiń baspasóz qyzmeti.
Oblystyq densaýlyq saqtaý basqarmasynyń baspasóz qyzmetinen málim etkendeı, kópirden sekirgen áıeldiń jasy – 29-da.
«Jedel járdem brıgadasynyń kóligimen oblystyq aýrýhanaǵa jetkizilgen áıeldiń júktiligi anyqtaldy. Júktilik merzimi – 4 apta. Onyń Oral qalasynda turatyny belgili boldy. Qazir dárigerler neırohırýrgııa bólimine túsken júkti áıeldiń jaǵdaıyn «ortasha» dep baǵalap otyr. Naýqastyń 4 qabyrǵasy synǵan. Oǵan medıtsınalyq kómektiń barlyq túri kórsetilip, emdeý sharalary jasalyp jatyr. Densaýlyǵy qalpyna kelip, saýyǵyp shyqqanǵa deıin dárigerler men psıhologtyń baqylaýynda bolady», -dep habarlady basqarmanyń baspasóz qyzmeti.
