Atyraýda kópbalaly ana ekinshi ret egiz bala tapty
ATYRAÝ. QazAqparat – Atyraýda kópbalaly ana ekinshi ret egiz bala tapty, dep habarlaıdy QazAqparat.
Oblystyq perınataldyq ortalyqta ekinshi ret egiz bosanǵan kópbalaly ana Móldir Májıtovanyń jasy – 36-da. Kúıeýi Rashıd Daıyrovpen birge 6 bala tárbıelep otyr.
«Eń úlkenimiz Nurıslam – 13 jasta, egizimiz Nursezim men Gúlsezim – 11 jasta. Odan keıin Ádilhan dúnıege keldi. Bıyl ol 1 jasqa toldy. Al egiz sábıge Kórkemaı men Erkemaı degen esim berdik», - deıdi Móldir Májıtova.
Dárigerlerdiń aıtýynsha, nárestelerdiń salmaǵy – 2 400 jáne 2 600 gramm.
«Kúıeýimniń úlken ájesinde egizder bolǵan. Biraq, bári shetinep ketken. Emshilikpen aınalysqan ájemiz urpaǵynda egizder dúnıege keledi dep boljaǵan», - deıdi ana.
Onyń aıtýynsha, 11 jyl buryn qursaǵynda sharana egiz ekenin bilgende, azdap qobaljyǵan. «Endi ekinshi ret egiz ómirge keletini týraly estigende qýanyshymyzda shek bolmady. Eń bastysy, balalarymyzdyń bári aman-saý ósip jatyr. Úlkeni dombyrada shertedi. Qazaqtyń ánderin shyrqaıdy. Oblystyq jáne respýblıkalyq án baıqaýlarynyń jeńimpazy atandy», - deıdi ol.
Anasynyń sózinshe, egizdiń bári bir-birine uqsaıdy.
Eske sala ketelik, Atyraýda ekouryqtandyrý tásilimen bala súıýge 232 kvota berilgen.
