Atyraýda kópbalaly ana alaıaqtyq jasaǵan
ATYRAÝ. QazAqparat – Atyraýdaǵy Mahambet aýdany Alǵa aýylynda turatyn 45 jastaǵy kópbalaly ana alaıaq bolyp shyqty, dep habarlaıdy QazAqparat tilshisi.
Tergeý barysynda anyqtalǵandaı, áıel Atyraýdyń 13 turǵynyn aldap, 50 myń teńgege olardy «QazMunaıGaz» AQ-na jumysqa kirgizýge ýáde bergen. Alaıaq áıel ár jábirlenýshiden aldyn ala 30 myń teńge alǵan, al qalǵan 20 myńyn olar qaıtyp kelgen soń tóleýge usynǵan. Alaıaq áıel aqshany alǵannan keıin ýádesin oryndamaıdy.
Alaıaq áıel buryn osyǵan uqsas qylmys úshin sottalǵan jáne eki jylǵa bas bostandyǵynan shekteý jazasyn alǵan.
№2 Atyraý qalalyq soty áıeldi QR Qylmystyq kodeksiniń 190-babynda (Alaıaqtyq) qarastyrylǵan qylmysty jasaýda kináli dep tanyp, oǵan 3 jylǵa bas bostandyǵyn shekteý jazasyn taǵaıyndaǵan.
«Sot úkimin shyǵarǵan kezde sot aıyptalýshynyń ókingenin jáne onyń kámeletke tolmaǵan 6 balasy bar ekenin eskerdi. Ol sonymen birge alaıaqtyq jolmen alǵan aqshany jábirlenýshilerge qaıtarýy kerek», dep habarlady sottyń baspasóz qyzmeti.
