Atyraýda kóp balaly ana 31 jyl qujatsyz ómir súrgen
«Jańylsyndy kishkentaı kezinde anasy tastap ketken. Ony ákesi men ájesi ósirgen. Olar ómirden ozǵanda Jańylsyn 16 jasta edi. Qujattarynyń bar-joqtyǵyna qaramastan, ol Atyraýǵa kóship ketken. Onyń otbasy, alty balasy bar. Sońǵy jyldarda ol qujattaryn alýǵa talpynǵanymen, ala almaǵan», - dedi «Nur Otan» partııasynyń Atyraýdaǵy fılıalynyń qoǵamdyq qabyldaý bólimshesiniń meńgerýshisi Gúlnara Shantemirova.
Onyń qujattaryn ala almaýyna týý týraly kýáliginiń joq bolýy sebep bolyp kelgen.
Ol «Nur Otan» partııasynyń qoǵamdyq qabyldaýyna kelgenimen, bul jerden kómek bolatynyna asa senińkiremegen.
«Biz Aqtóbe oblysynyń ádilet departamentine suratý joldadyq. Alaıda, ondaǵylar Oıyl aýdanynda mundaı adamnyń esepte joq ekenin aıtty. Departamentke qońyraý shalyp, aqtóbelik qyzmetkerlerden bir aýdannyń ǵana emes, búkil oblys boıynsha muraǵat qujattaryn qarap shyǵýyn suradyq. Nátıjesinde 1986 jyly týǵan Baqtygereeva Jańylsyn Aqtóbe oblysy Sýbar aýdanynda tirkelgen degen jaýap aldyq», - dedi G.Shantemirova.
31 jyl qujatsyz ómir súrip kelgen áıel qajetti qaǵazdardyń barlyǵyn jınap HQO-yna ótkizdi. Taıaý kúnderi ol jeke kýáligin alady. Al, qujaty arqyly Qazaqstan Respýblıkasynyń azamaty mártebesine ıe bolyp, balalarynyń járdemaqysyn ala alady.
