Atyraýda kóp balaly 26 ana «Altyn» jáne «Kúmis» alqa tósbelgisimen marapattaldy

ATYRAÝ. QazAqparat - Atyraýda qazirgi tańda oblys ortalyǵynda tórt jáne odan da kóp balasy bar 8 myńǵa jýyq áıel tirkelgen, dep habarlaıdy QazAqparat tilshisi.

Búgin Atyraý qalasy ákimdiginiń kishi zalynda kóp balaly 26 ana «Altyn» jáne «Kúmis» alqalarymen marapattaldy. Rásimge Atyraý qalasy ákiminiń orynbasary Ulyqbek Tinalıev qatysty. Quttyqtaý sózinde ol az qamtylǵan jáne kóp balaly otbasylardy áleýmettik qoldaý sharalary týraly aıtty. «Ótken jyly qalada eki mektep jáne úsh balabaqsha paıdalanýǵa berildi, taǵy jeti mektep salynýda. Bıyl kóp balaly otbasylarǵa memlekettik baǵdarlama boıynsha baspana berildi, oqytý júrgizilýde, jeke kásip ashýǵa granttar berilýde, jańa jyldan bastap járdemaqy men AÁK jańa formatta tólenetin bolady», - dedi Ulyqbek Tinalıev. Ákim orynbasarynyń aıtýynsha, áleýetti kómek alatyn barlyq kóp balaly otbasylar jańa jyldan bastap avtomatty túrde joǵary tólemdi járdemaqy alady. Mysaly, eger otbasy tórt balaǵa shamamen 10 myń teńge alsa, 2020 jyldan bastap járdemaqy 42 500 teńgeni quraıdy. «Járdemaqynyń mólsheri otbasyndaǵy balalardyń sanyna baılanysty bolady. Qabyldaýdyń basty sharty - otbasynyń bir mekenjaıy boıynsha tirkelýi, sondyqtan HQKO-ǵa barýdyń qajeti joq, úıde otyryp barlyq málimetterdi elektrondy sandyq qoltańbany paıdalanyp e-gov portalynan kórýge bolady», - dep túsindirdi qala ákiminiń orynbasary. Aıta keteıik, búginde Atyraýda jáne onyń mańynda 8 myńǵa jýyq kóp balaly ana tirkelgen. Olardyń 4854-i - tórt nemese odan da kóp bala tárbıelep otyrǵan áıelder, 283 batyr ana, 1626-sy - «Kúmis alqa» alqa ıegerleri, 1090 áıel «Altyn alqa» tósbelgisimen marapattalǵan.