Atyraýda qonaqúı órtenip jatyr

ATYRAÝ. QazAqparat – Atyraý qalasynda qonaqúı órtenip jatyr. Jalyndy sóndirýge 40 órt sóndirýshi tartylǵan, dep habarlaıdy QazAqparat tilshisi.

Órt búgin, 23 qyrkúıekte jergilikti ýaqytpen saǵat 14:58-de tutanǵan. Oblystyq tótenshe jaǵdaılar departamentine «Zodiac Hotel Atyrau» qonaq úıiniń órtengeni týraly shaqyrtý túsken.

«Órt sóndirýshiler shaqyrtý ornyna jetken kezde úsh qabatty qonaqúı ǵımaratynyń tóbe jabyndysynyń janyp jatqany anyqtaldy. Jalyn sharpyǵan aýmaq shamamen 800 sharshy metr. Qonaqúıdegi tóbe jabyndysynyń janýy saldarynan órt joǵarǵy qabatqa jaıyldy. Atalǵan órtten zardap shekkender joq. Adamdar qonaqúıden ózderi shyqty», - dep habarlady tótenshe jaǵdaılar departamentiniń qoǵammen baılany toby.

Qazir qonaqúıdegi órtti sóndirý jalǵasyp jatyr. Jalyndy sóndirýge bastapqyda Atyraý oblystyq tótenshe jaǵdaılar departamentinen 14 qyzmetker men 3 tehnıka tartylǵan.

Keıinnen qosymsha 26 qyzmetker men 6 tehnıka jumyldyryldy. Buǵan qosa memlekettik emes órtke qarsy qyzmettiń 8 qyzmetkeri men 3 tehnıkasy kómekke keldi.

Eske sala ketelik, buǵan deıin Atyraý oblysynda birneshe kúnnen beri Kaspıı teńiziniń jaǵalaýyndaǵy qamys órti áli tolyq sónbegenin habarlaǵan bolatynbyz.