Atyraýda kompanııanyń tólem júıesinen 11 mln teńgeni jymqyrǵan qylmystyq top ustaldy
Oblystyq polıtsııa departamenti baspasóz qyzmetiniń málimetinshe, polıtsııaǵa bir JShS qaýipsizdik qyzmetkeri iri kólemde aqsha urlanǵany týraly habar bergen.
«Krımınaldy polıtsııa basqarmasynyń qyzmetkerleri jedel is-shara uıymdasqan atalǵan seriktestikte buryn jumys istegen qyzmetkerlerden quralǵan uıymdasqan qylmystyq topty ustady. Onyń biri áli de sol seriktestikte qyzmet atqaryp, qajetti málimettermen bólisip otyrǵan. Ustalǵandardy tintý kezinde 31 jastaǵy er adamnyń úıinen 6 dana tólem termınaly, kompıýter komponentteri men qosymsha perıferııa qurylǵylary tabylyp, tárkilendi. Top músheleriniń biri tólem júıesine kirý parolderimen qamtamasyz etse, taǵy biri urlanǵan aqshalardy ózara bólip otyrǵan. Olar bıylǵy 21 naýryzdan 4 shildege deıin tólem júıesine zańsyz qol jetkizý jolymen jalpy somasy 11 mln 170 myń teńgeni urlaǵan» - deıdi Atyraý oblystyq polıtsııa departamentiniń bastyǵy Qamza Úmbetqalıev.
Onyń aıtýynsha, 6 adamnan turatyn top qylmystyq áreketterin 3 aı boıy iske asyryp kelgen. Qazir 31, 30, 28 jáne 26 jastaǵy 6 adamǵa qatysty QR Qylmystyq kodeksiniń 188-baby, 4-bóliginiń 3-tarmaǵymen sotqa deıingi tergeý júrip jatyr. Kinásyn tolyq moıyndaǵan uıymdasqan qylmystyq top músheleri ýaqytsha ustaý ızolıatoryna qamaldy.
Eske sala ketelik, budan buryn Atyraýda 24 mln teńgeniń esirtkisin satpaq bolǵan dinı aǵym ókilderi ustalǵanyn habarlaǵan edik.