Atyraýda kommýnaldyq kompanııalar aıyppul tóleýi múmkin
ATYRAÝ. QazAqparat - Ekologııa departamenti Jaıyq ózeninde balyqtyń qyrylý faktisi boıynsha «Atyraý Sý Arnasy» KMK-na qatysty tekserýdi aıaqtady, dep habarlaıdy QazAqparat.
Atyraý oblystyq Orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Arman Moldashevtiń aıtýynsha vedomstvoaralyq komıssııa múshelerimen birlesken jumys barysynda Jaıyq ózeninen 4 tonna 165 kg ólgen balyq jınaldy. Bıologııalyq ortaǵa jalpy somasy 4,2 mıllıon teńgeniń shyǵyny keltirilgen.
«Biz Jaıyq ózeniniń túbine súńgýir túsirdik, ol 30 metr radıýstaǵy aýmaqty zerttedik. Tekserý jumystary balyq qystaıtyn «shuńqyrlar» bar eki jerde júrgizildi. Ózen túbinde óli balyq ushasy tabylǵan joq Geolog kentindegi balyqtar otteginiń jetispeýinen qyrylǵany anyqtaldy, bul - tabıǵı sebep. Geologta aýlanǵan balyqtyń jalpy salmaǵy 230 kg», - dedi Arman Moldashev.
Sondaı-ak, Jaıyq ózeni sýynyń synamalary tekserilgen.
«Synaq nátıjelerine sáıkes, hlorıdter normadan asyp ketken. Atap aıtqanda, hlorıdterdiń naqty kórsetkishi 505,596 mg/dm3 qurady. Shekti jol beriletin kórsetkish 108 mg/dm3 bolǵanda tógindide asyp ketý 396,6 mg/dm3 qurady. Osylaısha, «Atyraý Sý Arnasy» KMK tarapynan QR Ekologııalyq kodeksiniń tabıǵat paıdalanýshynyń aǵyndy sýlarda lastaýshy zattardyń shoǵyrlanýyn belgilengen normatıvterden asyrmaýy týraly talaptary buzylǵan. Sonymen birge, kásiporyn aǵyndy sýlardy esepke alý jýrnalyn júrgizbegen.
Tekserý nátıjesi boıynsha Departament «Atyraý Sý Arnasy» KMK-ǵa qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 328-baby boıynsha belgilengen normatıvten asyp ketkendigi úshin ákimshilik is qozǵady.
Aıta keteıik, 6-25 jeltoqsan aralyǵynda «Ulttyq saraptama ortalyǵy» ShJQ RMK Atyraý oblystyq fılıaly barlyǵy 84 synama, onyń ishinde Jaıyq ózeniniń sýynan - 69 synama, STQ sý aǵyzý qudyǵynan - 8 synama jáne Atyraý qalasyndaǵy STQ sý qubyrynyń sýynan - 7 synama zerttedi.
«Bakterıologııalyq jáne hımııalyq kórsetkishterge zerthanalyq zertteý nátıjeleri boıynsha barlyq iriktelgen synamalar talaptarǵa sáıkes keledi, turǵyndardyń densaýlyǵyna qaýip tóndirmeıdi. Sonymen qatar, 8 jeltoqsanda «Ulttyq saraptama ortalyǵy» AF-na Jaıyq ózeninen tiri balyqtyń 7 synamasy alynyp, zerthanalyq zertteýge jiberildi, sáıkes kelmeıtinder joq», - delingen Ekologııa departamentiniń habarlamasynda.
Eske salaıyq, Atyraý oblysynda balyqtardyń jappaı qyrylýy jeltoqsannyń basynda bastaldy. Tórt kásiporyn tekserilip, eki qylmystyq is qozǵaldy.
