Atyraýda kólshikten 3 mln shabaq qutqaryldy
ATYRAÝ. QazAqparat – Atyraý oblysynyń Qurmanǵazy aýdanyndaǵy kólshikten 3,5 mln-ǵa jýyq shabaq qutqaryldy, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, Birlik aýyldyq okrýgine qarasty Amangeldi aýyly tusyndaǵy Rjanaý saıynda kóktemde ózennen kelgen sýdan shaǵyn kólshik paıda bolǵan.
«Saıdaǵy sazan, móńke balyqtarynyń shabaǵyn qutqarý úshin shuǵyl sharalar qolǵa alyndy. Oǵan jergilikti atqarýshy organ, orman sharýashylyǵy jáne janýarlar dúnıesi aýmaqtyq ınspektsııasynyń qyzmetkerleri men aýyldyń erikti jastary, sondaı-aq, «Kaspıı balyq», «Amangeldi» JShS-nan 60 adam jumyldyryldy. Atalǵan saıdan shamamen 3 mıllıonǵa jýyq shabaq qutqarylyp, Qıǵash ózenine jiberildi», - dep habarlady óńirlik kommýnıkatsııalar qyzmeti.
Eske sala ketelik, budan buryn Atyraýda Jaıyqqa bekire tuqymdas balyqtyń 3,6 mln-nan astam shabaǵy jiberilgen bolatyn.
