Atyraýda kolledj stýdentteriniń jappaı ýlanýyna ne sebep bolǵany anyqtaldy
ATYRAÝ. QazAqparat - Atyraýdaǵy kolledjdiń 20 stýdenti ne sebepti ýlanǵany jáne buǵan kimniń kináli ekeni anyqtaldy, dep habarlaıdy QazAqparat tilshisi.
«Atyraý servıs kolledjinde júrgizilgen tekserý barysynda oqý ornynda kimniń gazdy búrkip jibergeni anyqtaldy. Ol sonda bilim alatyn 2002 jyly týǵan stýdent bolyp shyqty. Stýdent buryshty gaz shashqan. Atalǵan fakt Sotqa deıingi tergep-tekserýdiń biryńǵaı tizilimine tirkeldi. Budan ózge aqparat QR QK 201-babyna saı jarııa etilmeıdi» delingen Polıtsııa departamenti taratqan habarlamada.
Eske sala keteıik, oqıǵa Atyraý servıs kolledjinde beısenbi kúni tús kezinde bolǵan. Sabaq ústinde stýdentterdiń birazy tunshyǵa bastaǵan. Sodan sabaq toqtatylyp, barlyǵy ǵımarattan shyǵarylǵan.
«20 adam ýlaný belgilerimen aýrýhanaǵa jatqyzyldy. 7 adam jansaqtaý bólimine tústi. Olardyń jaǵdaılary qalypty jáne ómirine qaýip tónip turǵan joq», - deıdi oblystyq densaýlyq saqtaý basqarmasynyń baspasóz hatshysy Amanjol Saǵynǵalı.
