Atyraýda kólikti mas kúıde basqarǵan 15 júrgizýshi bas bostandyǵynan aıyrylǵan
Oblystyq polıtsııa departamentiniń anyqtaý basqarmasy bastyǵynyń orynbasary, polıtsııa podpolkovnıgi Ánýarbek Tóráliniń aıtýynsha, bas bostandyǵynan aıyrylǵan júrgizýshilerdiń bári buǵan deıin kólikti mas kúıde júrgizgen. Sol sebepten, olar júrgizýshi kýáliginen aıyrylǵan.
«Bıylǵy jyl basynan beri bizdiń basqarmanyń qyzmetkerleri QR Qylmystyq kodekstiń 346-babymen 15 qylmystyq isti tergedi. Buryn mas kúıde kólikti basqaryp, 7 jyl merzimge júrgizýshi kýáliginen aıyrylǵandardyń taǵy da mas kúıde kólik tizgindep júrgeni anyqtaldy. Burynǵy áreketin qaıtalaǵany úshin aıyppul tóleımin dep oılaǵan quqyq buzýshylardyń áreketi qylmystyq sotta qaraldy. Atalǵan faktiler boıynsha barlyq zań buzýshyǵa 6 aı men 1 jyl merzimge bas bostandyǵynan aıyrý jazasy taǵaıyndaldy. Bas bostandyǵynan aıyrylǵan 15 júrgizýshiniń arasynda 2 áıel bar», -deıdi Ánýarbek Tóráli.
Onyń pikirinshe, mas júrgizýshilerdiń basym bóligi kólik júrgizgeni úshin ákimshilik qamaq nemese aıyppul kózdelgen dep esepteıdi. Alaıda, bul quqyq buzýshylyq ekinshi márte qaıtalanǵanda, sotqa deıingi qylmystyq is tergeledi.
«Mas kúıde kólik ekinshi márte basqardarǵa sot sheshimimen jaza taǵaıyndalady. Sondyqtan, eń aldymen mas kúıde kólik tizgindeý jol-kólik oqıǵasyna sebep bolatynyn, jol qozǵalysy qatysýshylarynyń densaýlyǵyna qaýip tóndiretinin eskergen abzal», -dedi Ánýarbek Tóráli.
Eske sala ketelik, budan buryn Atyraýda esirtki shegip, kólik júrgizgen jigit polıtsııadan qashpaq bolǵanyn habarlaǵan edik.
