Atyraýda kólik polıtseıi sýıtsıdtiń aldyn aldy
Keleńsiz jaǵdaı keshe 1 jeltoqsanynda saǵat 15.00 shamasynda bolǵan. Kóliktegi polıtsııa departamentiniń bastyǵy Ońal Bekeevtiń aıtýynsha, depo aýmaǵynda belgisiz er adam bes qabatty ǵımarattyń bıiktigindeı bolatyn mańaıǵa jaryq berip turatyn munaradan sekirmekshi bolǵan. Kólik polıtsııasynyń anyqtaýshysy Beksultan Jumadınov oqıǵa týraly habarlaǵan lokomotıv deposynyń ınstrýktor-mashınıstimen birge oqıǵa ornyna birinshi bolyp jetken. Beksultan Jumadınov mashınıstpen birge dereý munaraǵa kóterilip, ómirden túńilgen er adammen áńgimelese bastaǵan. Sóıtip, polıtsııa leıtenanty Jumadınov er adamdy oılanbaǵan is-áreketti jasamaýǵa kóndirgen.
Er adam alkogoldik mas kúıde bolǵan, ol ishimdik ishkenin jáne turmystyq jaǵdaılarǵa baılanysty ózin-ózi óltirmekshi bolǵanyn aıtqan.
«Álgi azamatpen sóıleskende, ol sý ishkisi kelgenin aıtty, sý ákelip berdim. Azdap tynyshtalǵannan keıin, oǵan jaılap bıiktikten túsýge kómektesip, polıtsııa bólimine alyp keldik»,- deıdi Beksultan Jumadınov.
«Polıtseıler 38 jastaǵy Atyraý qalasy turǵynynyń jeke basyn birden anyqtap, onymen profılaktıkalyq áńgimelesý júrgizip, medıtsınalyq qyzmetkerler qarap-tekserip bolǵannan keıin úıine jiberildi. Qazir onyń ómirine eshqandaı qaýip tónip turǵan joq, qazirgi ýaqytta otbasymen birge» - deıdi O. Bekeev.
Polıtsııa qyzmetkerileriniń aıtýynsha, áńgimelesý kezinde lokomotıv deposynyń ınstrýktor-mashınısi Saǵyndyq Bekmaǵambetov polıtsııa qyzmetkerine kómek kórsetip, ekeýi birlesip sýıtsıdtiń aldyn alǵan.
«Polıtsııa leıtenanty Beksultan Jumadınov ishki ister organdarynda 7 jyldan beri qyzmet etedi. Eńbek jolyn Atyraý stantsııasyndaǵy jelilik polıtsııa bóliminde patrýldik polıtsııa qyzmetkeri laýazymynan bastaǵan.
Departament basshylyǵy aldaǵy kúnderi óz qyzmetine úlken jaýapkershilikpen qaraıtyn B. Jumadınovty marapattaýǵa sheshim qabyldap otyr», - dep sózin túıindedi elimizdiń bas kólik polıtseıi O. Bekeev.
